Mudira Polîtîkayanê Cinîyan ya Şaredarîya Cizîrî Nergîs Ant ard ziwan ke înan heta nika seba cinîyan projeyê cîya-cîyayî viraştê û vat: “Ma rayberîya herême de îradeyê cinîyan esas gênê.”
Şaredarîya Cizîrê ke 8 serrî ra ver hetê qeyûm ra ameybî talankerdene, weçinitişê herême ya 31 Adare 2024î de hetê Partîya Têduştî û Demokrasîyî ya Şaran (DEM Partî) ra ameye girewtene. Şaredarî nêzdîyê serrêk a ke hetê DEM Partî ra yena rayberdene. Dima ke hemşaredarê Cizîrî dest bi xebatan kerd, îradeyê cinîyan esas girewt û na çarçewa de xebatê xo domnayê. Mudirîya Polîtîkayanê Cinîyan ya Şaredarîya Cizîrî ra Nergîs Ant bi munasebetê 8ê Adare Roja Cinîyan a Dinya xebatê xo seba ma ardî ziwan.
Nergîs Ant dîyar kerd ke înan tewr peyên seba cinîyan maxazaya Kezîyî seba piştgirîye akerda û vat: “Ma seba cinîyan ke rewşa înan a aborî baş nîya, maxazaya Kezîyî ya piştgirîye akerde. Ma aşma sibate de dest bi nê karî kerd. Ma heta nika xeylê keyeyan rê hetkarî kerde. Xebatêka weş bîye. Cinîyê ke ameyê tîya zaf keyfweş bîyê. Komelê ma hetê aborî ra xeylê zehmetîyan ancenê. Bi akerdişê maxazayî zaf zerrîweş bîyê. Na proje ewil Cizîr de dest pêkerd. Amancê ma o yo ke ma maxaza hîna hîra bikerê û hîna zaf hetkarî bikerê.”
Projeyê seba cinîyan
Nergîs Ant dîyar kerd ke roja ke şaredarî girewta, a roja ra heta nika înan seba cinîyan projeyê cîya-cîyayî amade kerdê û wina qisey kerd: “Dima ke ma şaredarî girewtê, ma ewil seba cinîyan dest bi xebatan kerd. Ma bi rayîrê şaredarî hewl da xo biresnê cinîyan û hetkarîya înan bikerê. Ma seba cinîyan ke zilmê camêrdan ra rî bi rî yê, xeta malûmatanê zilmî akerd ke bi saya nê cinîyî bieşkê xo biresnê ma. Cinîyê ke xo resnenê ma, ma hetkarîya înan kenê. Hem hetê hiqûqî ra û hem zî hetê psîkolojîkî ra ma hewl danê ke hetkarîya înan bikerê. Eke waştişê înan bibê zî ma bi ca anê. Sazîyê cinîyan û baro pîya hetkarîya înan kenê. Ma programanê sey şano, şayî û kombîyayîşan kenê. Ameyoxî de projeya ma ya merkezê piştgirîya cinîyan est o. Ma do demêko nêzdî de akerê. Bi munasebetê 8ê Adare zî ma do JinKartan vejê û bidê heme cinîyan. Ma hewl danê ke biresnê 8ê Adare.”
‘Îradeyê cinîyan esas gînê’
Peynîya qiseykerdişê xo de Nergîs Ant ard ziwan ke eksê şaredarîyê sîstemî ê rayberîya cinî esas gênê û wina dewam kerd: “Ma rayberîya herême de îradeyê cinîyan esas gînê. Her di hemşaredarê ma zî tîya ra yê û komelî baş şinasnenê. Seba ke problemanê cinîyan çareser bikerê, hîna zaf hewl danê. Ma sey mudirîyeta polîtîkayanê cinîyan zî problemanê cinîyan ser o kombîyayîşan kenê û hewl danê ke înan çareser bikerê. Waştişê cinîyanê Botanî zî cinîyê Botanî zanê. Nê semedî ra zî ma bi rehetî cinîyan reyde kewenê têkilî û waştiş û problemanê înan goşdarê kenê.”
