Komxebata ke Şaxanê Egîtîm Senî yê Amedî, Çand Amed de virazenê, do di rojan dewam bika, destpê kerd. Temsîlkarê Egîtîm Senî dîyar kerdê ke do qalê perwerdeyê bi ziwanê dayîke bikerî û vatê: “Bi na komxebate ma do bal heme hetanê komelî biancî ser perwerdeyê bi ziwanê dayîke.”
Şaxanê Sendîkaya Kedkaranê Zanîst û Perwerdeyî (Egîm-Sen) yê Amedî bi sernameyê “Perwerdeyê bi ziwanê dayîke de ver bi çareserîye rê: Îmkananê Est ê, Astengî, Pêşnîyazî” Çand Amed de komxebatêk viraşt. Ziwanzan, akademîsyen, roşnvîr mîyan de zaf temsîlkaranê sazîyê sivîlî û partîyanê sîyasî beşdarî komxebate bîyê. Ser nameye Egîtîm Senî Faruk Ercan metno nuşteyî wend.
Ma wazenê rewşa ziwanê dayîke şênber bikerê
Faruk Ercan dîyar kerd ke sendîkaya înan bi serran a seba perwerdeyê bi ziwanê dayîke têkoşîn dana û wina va: “Ma sey mamosteyanê nê welatî her roj perwerdeyê bi ziwanê dayîke çi aneno serê domanan dîyenî. Bi nêheqîye ra rî bi rî yê, hîs kenî û cuyenê. Helbet ma tena bi hîsan hereket nêkenê. Hem pedegojîk hem polîtîk nêzdî na mesele benê. Bi na hişmendî ma wazenê tena waştişê perwerdeyê bi ziwanê dayîke ser bivinderê. Bi na komxebate armancê ma no yo ke zaf hetan ra perwerdeyê bi ziwanê dayîke goreyê rewşa ewroyin şênber bikerê.”
Ma her hetan ra ziwanê dayîke biercnê
Faruk Ercan derheqê komxebate de nê agahî da: “Ma hemnanî, verê pêvajoya pêvînayîşî qerarê na komxebate girewtbî. Dima aşma citmenge her çiqas bi guman bo zî hêvîyêk komelî de awan bîya. Na hêvî seba nîqaşê çareserîya problemê perwerdeyê bi ziwanê dayîke ra zî îmkan awan kerdo. Nê demî de ma wazenî bi xorîn û azadane nê meseleyan qise bikerî. Ma bawer ê xebatanê bi nê rengî rayîrê aştîye asanêr bikerê û pêameyîşê na hûmarî sazî û kesan seba awankerdişê komelêkî ye demokratîke bibo gamêk. Ma wazenê heme hetan ra perwerdeyê bi ziwanê dayîke bi ercnî, hetê huquqî ra zî rewşe ra biewnî. Goreyê rewşa Tirkîya heme hetê qanûnan nê îmkanî çî yê, kam qanûn verê perwerdeyê bi ziwanê dayîke gênê, seba bedilnayîşê ma eşkenî çi pêşnîyaz bikerê? Ma wazenê hetê pedegojîk û polîtîk na mesele biercnî. Perwerdeyê yewziwanî ser psîkolojîya domanan tesîrêkî senî keno? Asîmîlasyon çi yo, rêbazanê serkerdişî ser çi yê? Ma wazenê ceribnayîşê Îrlandaya Bakûr, Îskoçya, Kanada her wina herêma Baskî ya Îspanya biewnî. Gelo heqê ziwan ser aştîya komelî de tesîrêkî senî keno? Helbet ma wazenê projeksîyonê xo hera bikerê. Ser rewşa lehçeyanê kurdkî û ziwanê herême bivinderî.”
Faruk Ercan qiseyê xo wina bi peynî kerd: “Egîtîm Sen sey kanşopîyêk her tim seba ziwanê kurdkî têkoşîn dano. Verê Darbeya 12ê Êlule bin banê TOB-DER’î de dersanê kurdkî ameyî dayene. Ewro armancê na komxebate nê bonderkerdişê ziwanî yo, ewro ma do behsê perwerdeyê bi ziwanê dayîke bikerê. Ma hêvîdar ê bi na xebate ma do bal heme hetê komelî biancî ser perwerdeyê bi ziwanê dayîke ra û bikerê rojeva raya pêroyî ya sereke. Armancê ma no yo, ma biresnê netîceyo weş. Ma do hewl bidê, ma do têkoşîn bidê, peynî do qatî bi serkewê.”
