Komela Cinîyan a Rosa Amed de bi sloganê, “Bi Jin Jîyan Azadî ver bi awankerdişê aştîyêka birûmet” kongreya xo ya 4. kerde.
Komela Cinîyan a Rosa Kongreya xo ya 4. Salona Konferansî ya Alî Emîrî ya Şaredarîya Amedî ya Şaristanê Girdî de kerde. Tewrê serekanê verê yê komele, rayberê cinî ê partîyanê sîyasî û xeylê temsîlkarê cinî ê sazgehanê komelkî yê dmeokratîlî beşdarê kongre bîyê. Kongre de xebatî ke 8 serran de ameyê kerdene, ameyê parekerdene û rayberîya newa ameye weçînitene.
Kongre bi sloganê, “Bi jin jîyan azadî ver bi awankerdişê aştîyêka birûmet” ameye kerdene û kongre de babetê derheqê rewşa cinîyan, prosesê aştî, heqê cinîyan û awankerdişê aştî de rolê cinîyan ame munaqeşekerdene.
Têkoşîno hempar
Kongre bi rêzgirewtiş û mojnayîşê sînevîzyonî dest pêkerd. Nameyê Komela Rosa ser o Suzan Îşbîlen qisey kerd. Suzan Îşbîn bale ant proseso ke Rayberê Şarê Kurdî Abdullah Ocalanî bi nameyê “Aştî û Komelê Demokratîk” dayo destpêkerdene û wina vat: “Ma pîya game bi game têkoşînê hempar bikerê, ma do nêvinderê.”
‘Ma do pîya rayra şêrê’
Endama TJA’yî Ayla Akat Ata nameyê TJA ser o qisey kerd û dîyar kerd ke do têkoşînî bi vatişê Abdullah Ocalanî yê “Heta cinî azade nêba, komel zî azad nêbeno” bidomnê û nê çîyî vatî: “Ma do roşnîya cinîyanê xoverdayox ê Rojavayê Kurdîstanî reyde, nê rayîrî de pîya rayra şêrê.”
‘Ma do bibê veng û waştişanê cinîyan’
Zeynep Sîpçîk a ke seba Serekîya newe ya komele ameye weçînitene zî qisey kerd û wina vat: “Demo ke vanê Rosa, xoverdayîşê cinî yeno ma vîrê merdimî. Prosesêkî de waştêne vengê cinîyan bibirnê. Ez hêvî kena ke ma do bibê veng û waştişanê cinîyan. Ma na berpirsîyarî girewte milanê xo ser o.”
Kongre de şertê giran ê cuya cinîyan, têkoşînê înan ê komelkî û sîyasî û rêbazê seba têkoşînê ameyoxî ameyê munaqeşekerdene. Cinîyan hêrişê Rojhelatê Kurdîstan û Îranî şermezar kerdê. Komela Rosa çalakîyê xo yê serrêk eşkera kerdê.
Kongre bi vatişê sloganê “Jin Jîyan Azadî” qedîyaye.
