Endama Meclîsê Dayîkanê Aştîye Raîfe Ozbey derheqê Konferansê Dayîkanê Aştîye do siba Amed de dest pêkeno de qisey kerd û va: “Armancê ma pêardîşê aştî, seyyewbînanî û qedînayîşê şerî yo.”
Meclîsê Dayîkanê Aştîye peynîya 12 serran do Awanîya ÇandAmedî ya Şaredarîya Şaristanê Girdî yê Amedî de siba bi şiara “Dayîk Pêşengê Komelê Demokratîkî û Aştî Mendeyî yê” konferansêk bivirazî. Konferans do 2 rojî dewam bikero. Endama Meclîsê Dayîkanê Aştîye yê Amedî Raîfe Ozbey derheqê konferansî de qisey kerd û ard ziwan ke babeta înan ya konferansî ya sereke aştî û waştişê qedînayîşê şerî yo.
Raîfe Ozbey da zanayene ke nê 12 serrî ke konferans nêviraştî û wina va: “Ma aşmêka verê bi Dayîkanê Aştîye ra delegeyanê xo weçîna. Do Dayîkanê Aştîye yê Kurdistanê Bakûrî û Tirkîyaye beşdarî konferansî ra bibê. Ma do konferansî de ser prosesê Aştî û Komelê Demokratîkî nîqaşan bikerî. Ma do armanc û waştişê xo konferansî de bîyarê ziwanî. Babeta ma ya sereke zî aştî û azadî ya.
‘Xêrnêwaşt wa proses xira nêkerê’
Raîfe Ozbey bal ant ser provokasyonê vera prosesi de û wina domna: “Armancê ma pêardîşê aştî, seyyewbînanî û qedînayîşê şerî yo. Wa provokasyon nêvirazî, xêrnêwaşt wa proses xira nêkerî. Çi destê ma ra bêro ma zî do bikerî. Wa êdî cayê çekan qalem bêrê şuxulnayîş. Dinya meseleya kurdî de kerr û kor a, çîre nêzanena û ser rîyê Dinyaye de çend milyon kurdî cuyenê. Wa ma bêrê naskerdene wa fek provoskasyonan bêrê veradeyene. No şar cuyayêka bi rûmet cuyeno û proses biresnê armancê xo.”
