Komîsyonê Cinîyan ê KNK’yî, dîyar kerd ke tehdîtê vera şarê êzidîyan hema zî dewam kenê û waşt ke seba ewleyîya Şengalî statuyê otonom bêro naskerdene û aqûbetê cinîyanê vîndîbîyayan bêro eşkerakerdene.
Komîsyonê Cinîyan ê Kongreya Neteweyî ya Kurdîstanî (KNK), bi munasebetê serrgêra 12. ê Qirkerdişê Şengalî de eşkerayîyêk da. Eşkerayî de, ame dîyar kerdene ke tehdîdê vera şarê êzidî hema zî dewam kenê, vengdayîş de ame waştiş ke Şengal, mîyanê çarçewaya qanûnanê Iraqî de bibo wayîrê statuyêk otonom.
Komîsyonê Cinîyan ê KNK’yî eşkerayîye de bale ante hêrişê 3ê tebaxa 2014î ser o û dîyar kerd ke no hêriş tena qirkerdişêko fîzîkî nêbî, eynî wextî de amancê înan nasname û kulturî êzidîyan bi.
‘Aqûbetê hezaran cinî nêyena zanayîş’
Komîsyonê Cinîyan ê KNK’yî, ard vîr ke bi hezaran cinîyê êzidî ameyê remnayîş, ameyê tecawizkerdiş, ameyê îşkencekerdiş û bazarê koleyan de ameyê rotiş; ser o 12 serrî derbas bîyê la hema zî aqûbetê înan nêyena zanayîş.
‘Bingeyê nê hesaban jeostratejîk ê newe yê’
Eşkerayîye de qalê alozîyê ke nê demanê peyînan de, dorûverê Şengalî de vejîyê zî ame kerdene. Ame dîyarkerdene ke tehdîdê herême, bi nakokîyanê mabenê Şîî û Sûnîyan nêyenê îzahkerdene. Eşkerayîye de ame vatiş ke amanco bingeyîn no bi ke, goreyê hesabanê newe ê jeostratejîk, kontrolê herême bêro destkewtiş.
Eşkerayî de ame îşaretkerdiş ke Şengal cayêko stratejîk o ke Vakur, Başûr û Rojavayê Kurdîstanê bi yewbînan girê dano. Sewbîna ame îfadekerdene ke na herême mîyanê sînoranê wîlayetê Musulî de ca gêna, xeylê serran o bîyo warê reqabet hêzanê herême û dinya.
‘Ganî game şênberî bêrê eştene’
Komîsyonê Cinîyan ê KNK’yî, eşkerayîye de dîyar kerd ke naskerdena qirkerdişî, asta mîyanneteweyîye de averşîyayîşêko muhîm o, la eynî wextî de ame vatiş ke hukmat û parlamentoyê ke nê qirkerdişî nas kerdê, seba ameyoxo ewle yê şarê êzidî gamê sîyasî ê şênberî nêeştê.
Komîsyonê Cinîyan ê KNK’yî, îfade kerd ke seba ke Şengal de edalet bêro caardene, ganî cinîyê êzidî ê vîndîbîyayeyî bêrê vînayîş û berpirsî bêrê muhakemekerdiş û mîyanê çarçewaya qanûnî ê Iraqî de statuyê otonom seba Şengalî bêro naskerdene.
Peynîyê eşkerayîye de ame vatiş ke seba ke êzidî bieşkê xo bipawê, bawerî û kulturê xo bi hawayêko azad biciwîyê, ganî Şengal bibo herêmêko xoser û vengdayîşê komelê mîyanneteweyî ame kerde, taybetî seba ke cinîyê êzidî bieşkê cuyêka bêters û azad biciwîyê, berpirsîyarêyê xo yo dîplomatîk û sîyasî bigrê mile xo ser.
