Keyeyanê Roboskî ardî ziwan ke înan paştî danê nê prosesî û seba ke bawerîya înan proses ra biba wa dewlete kiştoxanê Roboskî muhakeme bikera.
Serekê MHP’yî Devlet Bahçelî citmenga 2024’î de Meclîs de destê xo derg kerd temsîlkaranê DEM Partî. Badê cû veng da Rayberê Şarê Kurdî Abdullah Ocalanî ke Meclîs de veng bido PKK’yî. Badê nê vengî Tirkîye û Kurdistan de yew proses avera şî. Rayberê Şarê Kurdî Abdullah Ocalanî zî cewab da nê vengî û 27’ê Sibatî de mesajê “Aştî û Komelê Demokratîkî” bi raya pêroyî rê pare kerd. Badê vengdayîşê Rayberê Şarê Kurdî Abdullah Ocalanî, PKK zî verpers da vengî û xo fesih kerd. PKK’yî 12’ê Gulane de netîcenameyê kongreya xo raya pêroyî rê pare kerd.
Eşkera kerd ke xo fesih kerdo. Badê qerarê PKK’yî çimê raya pêroyî ya Kurdistan, Tirkîye û dinya zî hukmatê Tirkîye ser o bi ke gamê hîrayî bierzî. La peynîya qerarê PKK’yî zî Tirkîye hêrişanê xo herêmanê Pawitişî yê Medya ser o domneno.
Welatijyê Kurdistanî ke şerê 50 serran de zaf dej û bedel dayê, wazenê ke dewlete gamanê hîrayî bierja. Yew zî înan ra keyeyanê Roboskî yo. Teyareyanê şerî 28ê kanûna 2011an de dewa Roboskî ya qezaya Qilebanî ya Şirnexî bombe kerdbî. Hêrişê teyareyanê şerî de 19 tenî înan doman 34 welatij ameybî kiştiş. 14 serrî vîyart la hema zî hesab nêame persayîş. Na proses keyeyanê Roboskî zî wazenê ke hesab kiştoxan ra bêro persayîş. Wazenê ke kiştoxan bêrê muhakemekerdêne û ceza kerdiş.
‘Hetanî kiştoxî bêrê ceza kerdêne ma do têkoşîn bidê’
Qirkerdişê Roboskî de yew kesê ke amey kiştiş Serhat Encu yo 16 serrî bi. Serhat Encu zî embazanê xo ra pîya seba debarê keyeyî şîbî sînor. Agêrayîş de hêrişê hewayî de cuya xo vîndî kerd. Dayîka Serhat Encu Helîme Encu bi vatişê “14 serran de ma qet weşî nêdî” dejê xo ana ziwan.
Helîme Encu da zanayîş ke 14 serrî qirkerdiş ser ra derbas bîyê zî dejê înan sey ewro yo û waşt ke kiştoxanê Roboskî bêrê ceza kerdêne. Helîme Encu bal ant ser proses ke Kurdistan û Tirkîye de dest pêkerda û wina domna: “Dejê ma jan dano. La ma vanê ke nika bila zerrîya çew dayîkan nêveşo. Ma veng danê dayîkanê tirkan zî destê xo bidê yewbînan. Nika verê nê şerî bigî û aştî pê bêro. Seba aştîye dewlete zî game bierza. La hetê dewlete gamêke nêameya eştiş, ma sey keyeyanê Roboskî wazenê ke kiştoxanê domananê ma bêrê cezakerdiş. Ma vanê ke wa aştî virazîyo. La seba nê zî wa dewlete gamane bierza. Hetanî ma weş ê, ma do kiştoxan ra hesab bipersî û wazenê ke bêrê cezakerdêne.”
‘Seba aştîye kiştoxanê Roboskî bêrê cezakerdiş’
Yew kesê ke qirkerdişê Roboskî de amey kiştiş Mehmet Alî Tosûn yo 23 serrî bi. Bapîrê Mehmet Alî Tosun Zekî Tosun dest nîşan kerd ke eke dewlete bi zerrî ra ya wa kiştixanê Roboskî ceza bikero û wina dewam kerd: “14 serrî qirkerdişê Roboskî ser ra derbas bîyê. La dejê ma newî yo. Ma sey keyeyanê Roboskî her tim vanê adalet. Ma wazenê ke kiştoxanê Roboskî bêrê cezakerdiş ke hêsîrê çimanê dayîkanê Roboskî vindarê. Nê 14 serrî, hezar serrî zî derbas bibê zî ma do qirkerdişê Roboskî vîr ra nêkerî. Eke dewlete aştîye wazeno wa kiştoxanê Qirkerdişê Roboskî zî ceza bikero. Ma sey keyeyanê Roboskî wazenê ke dewlete gamê bi zerrî ra bierza. Ma heme zî paştgirîya prosesî kene.”
‘Seba aştî pê bêra wa dewlete zî gamanê bierza’
Qirkerdiş de yew kesê ke amey kiştiş Nevzat Encu yo 19 serrî bi. Bapîrê Nevzat Encu Hîkmet Encu zî va ke sey keyeyanê Roboskî ê zî wazenê ke prosesî vera aştî û demokrasî şîro û wina qedîna: “Domanê ma seba nanê xo şehîd bîyî. Domanê ma bi bombayanê teyareyanê Tirkîye ameyî kiştiş. 14 serrî derbas bîyê la hîna qet kes nêameyê cezakerdêne. Ma wazenê ke kiştoxî bêrê cezakerdiş. Dejê ma zaf gird a. Dejê ma nîno vîrakerdiş. Ma sey keyeyanê Roboskî vanê ke ma paştgirîya na prosesî kenê.”
