KCKyî serrgêra Şorişê Rojava de eşkerayîyêk da û eşkerayî de derheqê Şorişê Rojava de wina ame vatene: ‘’Şarê Rojavayê Kurdîstanî heme destkewteyê xo xeta Rayber Apoyî de fînayî dest. Şarê ma do naye ra pey zî bizano ke destkewteyanê xo xeta Rayber Apoyî de bipawo û aver bêro.”
Hemserekîya Konseya Rayberdişî ya KCKyî bi wesîleya serrgêra 14. ya Şorişê Rojawanî yê 19ê temmuze eşkerayîye daye. KCKyî şehîdê şorişî yad kerdî û vat Şorişê Rojawanî netîceya têkoşîne vera rejîmê BAAS û DAÎŞî de ame meydan û Rojawan de hetê şaranê cîya cîyayan ra bingeyê netewa demokratîke cuyeyêka hempare ameye awankerdene.
Eşkerayîye de bale ameye antene muhîmîya rolê serkêşî yê cinîyan ser û ame vatene ke modela demokrasîya herêmî û rayberîya xoserî hetê Rojhelatê Mîyanênî ra tecrubeyêko muhîm o.
Eşkerayîye de ame îfadekerdene ke sîstemo demokratîko ke Rojava de ameyo ronayene hedefê hêzanê herêmî û mîyanneteweyî de yo û nê çîyî ameyî vatene: ‘’Şaranê Rojava têkoşînê vera DAIŞî de bedelê girdî dayî û merdimîye no bela ra xelsina. Nê têkoşînî de bi hezaran gerîlayan hetê şarê Rojava de ca girewt û şer kerd. Hezarî ra zafêr gerîlayê ke Vakurê Kurdîstanî ra şîyî, şehîd bîyî. Gerîlayê ke Rojhêlat û Başûrî ra şîyî, înan zî şer kerd û şehîd bîyî. Enternasyonalîstê ke çar hetanê dinya ra ameyî ê zî şehîd bîyî. Sîstemo demokratîk ê Rojawanî bi nê bedelan ame ronayene. Gama qalê destkeweyanê Rojava yeno kerdene, wa nê berdêlî çirey nêrê vîrakerdene.’’
KCKyî vera cehdkerdişê mabênê şaran de vetişê pêrodayîşî hîşyar kerd û vat, ‘’Şarê Rojavayê Kurdîstanî heme destkewteyê xo xeta Rayber Apoyî de fînayî dest. Şarê Rojawanê Kurdîstanî do naye ra tepîya zî bizano ke destkewteyanê xo xeta Rayber Apoyî de bipawo û aver bêro.’’
Eşkerayîye de reyna ame vatene ke Sûrîye de Aştîya mendî têna bi sîstemekê demokratîkî yo ke tede demokrasîyê herêmî û rayberîya xosere ca genê, mumkun a.
KCKyî îfade kerd ke fehmê îdareyêkê merkezî û otorîterî do problemanê neweyan biafirno û vat Surîyayêka demokratîke ya ke tede kurd, ereb, suryanî, tirkmen, çerkes, armenî, elewî, sunnî, durzî û êzidîyî pîya ciwîyenê do yewîya welatî xurtêr bikero.
KCKyî vat ê do sey Têgêrayîşê Azadîye yê Kurdîstanî tim paştî bidê têkoşînê demokrasî û azadîye yê şaranê Sûrîye û vat ê pê bawer ê ke şarê Rojava bi ruhê Şorişê 19ê Temmuze destkewteyanê xo bipawê.
