KCK derheqê vengdayîşê îqtîdarî yê “çekan ronê” de vat: “Seba ke nê vengdayîşî bêrê qebulkerdene, verê ganî şertê xebitîyayîşê azadî, komunîkasyonê azadî û ciwîyayîşê azadî yê Rayber Apoyî bêrê temînkerdene.”
Komployê mîyanneteweyî yê 15ê sibate yê 1999î ke Rayberê PKK’yî Abdullah Ocalanî ser o ameyo kerdene serra xo ya 26. de yo. Serrgêra komployî de munaqeşeyê çareserîya meseleyê kurd û demokratîkbîyayîşê Tirkîya rojev de yê. Rojanê ameyoxan de yeno pawitene ke Rayberê PKK’yî Abdullah Ocalanî ra yew vengdayîşo tarîxî bêro.
PKK’yî vizêr beyanatê xo yê serrgêra komployî de dîyar kerd ke “Bi beyanatê Rayber Apoyî yo ke yeno pawitene prosesêko newe do dest pêbikero. Her çî bi yew beyanatî nêbeno û her çî tena Rayber Apo nêkeno. Problem ê ma hemînan o, wezîfe zî yê hemînan o.”
KCK’yî zî seba serrgêra komployî beyanat da. Beyanato de ke Ajansa Xeberan a Firatî (ANF) de ca gêno, behsê munaqeşeyanê prosesê neweyî û vengdayîşê îqtîdarî yê “çekan ronê” ameyo kerdene.
Azadîya Ocalanî ser o ame vindertene
Beyanatî de 15ê sibate sey “rojêka sîyaye” ameye terîfkerdene û wina dewam kerd: “Merheleya ke ma resayê de êdî wextê ey ameyo ke ma na roja sîyaye, na roja qirkerdişî bikê rojêka azadî û xelasîye. Cehdo ke Rayber Apo, seba çareyêko demokratîk reyna wazeno prosesî biramno, bi no bingeyî yo.”
Beyanatî de behsê înkarkerdişê heqê ziwan, kultur û nasnameyî yê kurdan ê seserra 20. de ame kerdene û wina ame vatene: “Na merheleya ke ma ameyê sîyasetê înkar, îmha û qirkerdişî êdî xeripîyayo. Îqtidarê ke sîyasetê înkarî de israr kenê ser nêkewtê. Eke nêzdîbîyayîşê xo yê kurdan ser o bi hewayêko demokratîk nêvurnê, eynî çî paweyê hukmatê AKP’yî yo zî. Hukmato ke tewr zaf dişmenîya kurdan keno, hukmatê AKP’yî yo.”
‘Ganî şertê cuya azade bêrê temînkerdene’
Beyanat de ame vatene ke: “Dewaya Rayber Apoyî, dewa seserrin a û çareyê ey zî do çareyê seserrin bo.” Û sewbîna zî ame dîyarkedene ke ganî azadîya fîzîkî ya Rayberê PKK’yî Abdullah Ocalanî bêra temînkerdene. Beyanatî de bale ancîyaye pêvînayîşê ke Hepisxaneyê Îmralî de bîyê û vengdayîşê îqtîdarî yê “çekan ronê” ser o û wina ame vatene: “Di hebî pêvînayîşê Rayber Apo û heyetê DEM’î bîyî. Reyna hetê hukmatî ra her roje vengdayîşê ronayîşê çekan û wedarnayîşê rêxistine yenê kerdene. La şertê cuye û xebata Rayber Apo’yî de qet vurîyayîşêko şenik zî nêyeno kerdene. Seba ke nê vengdayîşê ke serekîya ma û tevgerê ma rê yenê kerdene bêrê qebulkerdene, verê ganî şertê xebata azade, komunîkasyonê azadî û cuya azade ya Rayber Apo’yî bêrê temînkerdene.”
Beyanatî de ame vatene ke hêrişê Herêma Federal a Kurdîstanî û Bakur û Rojhelatê Sûrîye dewam kenê. Reyna operasyonê tepiştişî ke hunermendan, rojnamegeran û sîyasetmedaran ser o yê û tayînkerdişê qeyûman ê şaredarîyan ser o ame vindertene û wina ame vatene: “Nê pêroyî bêsamîmîya AKP’yî mojnenê. Her keso ke pawitişî de yo, ganî verê veng bido AKP’yî ke samîmî bo û seba ke vurîyayîşêko wina vejîyo orte, ganî bikewo xebatêka praktîke ya xurte.”
