KCDK-E’yî bi munasîbetê 11. serrgêra Qirkerdişê Şengalî, mesajêk weşîna û veng da ke ganî statuyê Şengalî bêro şinasnayîş.
Kongreya Komelê Demokratîkî ya Kurdî ya Ewropa (KCDK-E) derheqê qirkerdişî ke DAIŞ’î 3’ê Tebaxe 2014î de Şengal de kerd, mesajêko nuştekîye da.
Mesaj wina yo:
“DAIŞ’î 11 serrî verê cû 3ê Tebaxa 2014î de Şengal de vera şarê ma yê êzidîyan jenosîd-fermanêko hovî kerdo. Na roje ne tena seba êzidîyan, la seba heme merdimeyeyî rûpelêko tarî yo. Ma na hovîtîya ke bi taybetî cinî û domanî kerdî hedef, bi hezaran kesî ameyî qetilkerdiş û bi des hezaran kesan ci û welatanê xo ra ameyî koçberkerdiş, bi tundî şermezar kenî. Ma ê kesanê ke cuyê xo vînî kerdî bi hurmet û rêz anî vîrê xo.
No jenosîd verê çimanê dinya de bi, la belê çi heyf komelê mîyanneteweyî bi pêroyî bêveng mend. Bi hezaran cinîyê êzidî ameyî remnayîş, bi hawayêkî sîstematîk destdergî înan ra ameyî kerdiş û bazarê koleyan de ameyî rotiş. Hîna bi hezaran cinî û domanî winda yê; no yew wicdanê merdimeyeyî de birîneyêka xorîn a. Bêvengîya dinya na trajîdî hîna girantir kerde. Vera hovîtîya DAIŞ’î, tena gerîlayanê Azadîya Kurdistanî û YPG/YPJyî bîyî hêza pawitişî û şarê êzidîyan verê qirkerdişî ra xelisnayî. Bi xoverdayîşê înan a tarîxî, jenosîdê pêroyî yê êzidîyan ame astengkerdiş. Ma nê xoverdayîşî bi minetdarî silam kenî, qehreman û pakrewanê ke cuyê xo vînî kerdî bi rêzdarî anî vîrê xo. Çi heyf, tay hêzanê ke seba pawitişê Şengalî berpirsîyarî bî, wextê hêrişan de herême terk kerd û şar bêpawitiş verada. Na xemsarî karesata Şengalî xorîn kerd. Ewro zî, tehdîtê ke serê heqê şarê Şengalî yê xo bi xo bi rayîrberdiş û xopawitişî ra est î, dewam kenî. Şarê Şengalî wazeno ke serê ardê xo de cuyêka xosere awan bikero û seba nê îradeyî rastê zordarîyan yeno. Bi têkewtişanê teberî, hewl yeno dayîş ke îradeyê înan bişiko.
Ma sey KCDK-E reyna bi qerar vanî: Têkoşîna pawitişê bawerî, nasname, ziwan, kultur û ardê şarê êzidîyan, têkoşînêko rewa ya heqê merdiman a. Dewleta Iraqî, raya pêroyî ya herêmî û cîhanî ganî na têkoşîn û xoverdayîş hetkarî bikero. Ma wazenê ke Kurdistanî, dostanê kurdan û heme merdimaeyeyî Şengalî dorme de xelekêko yewbîyayîşî awan bikerî û vera plananê lêmînan ê ke serê êzidîyan yeno kerdiş têkoşînê xo xurt bikerî. 11. Sergêra Qirkerdişê Şengalî: Ma vîr ra nêkenî û nêdanî vîr ra kerdiş!”
