Endamê Akademîya Zanistanê Komelkî yê Abdullah Ocalanî Duran Kalkanî dîyar kerd ke ê qerardar ê ke seba vurîyayîş-ravuryayîşê ke Rayberê Şarê Kurdî Abdullah Ocalanî dayo destpêkerdene, ey rê nêzdî bibê û bîyarê ca. Tirkîya do ravurîyo û êyê ke vera naye vindenê, do vindî bikerê.
Endamê Akademîya Zanistanê Komelkî yê Abdullah Ocalanî Duran Kalkanî programêko taybetî yê Medya Haber TV de erjnayîşî kerdî.
‘Problem îqtîdarî ra yeno’
Kalkanî îfade kerd ke sey Têgêrayîşê Azadîye prosesî de ke ke Rayberê Şarê Kurdî Abdullah Ocalanî dayo destpêkerdene, gamê hewceyî eştê û vat: “Problem biney îqtîdarî ra yeno. No zelalî ganî bêro vatene. Ma fehm nêkerd xo ra. Rey vanê lezbezîye hewce nîya. Rey vanê ganî zaf lez bibo. Bêîstîqrarîye est a. Dîyar o ke stratejîk nêzdî nêbenê. Taktîkê rojane û feydeyanê sîyasîyan ser o nêzdî benê. Helbet ke wina nêzdîbîyayîşêk raşt nîyo û zî talûkeyin o.”
‘Ma do Tirkîya de vurîyayîşê demokratîkî bikerê’
Kalkanî vat: “Ma îdeolojîk û stratejîk nêzdîyê prosesî bîyê. Vurîyenê, Ravurîyenê, do bivurîyê zî, naye de ma qerardar ê. Rayber Apoyî zî vat ke agêrîyayîşê naye çin o. Ma rê agêrîyayîşê vurîyayîş û ravurîyayîşê naye çin o. Ma do nivurîyê û Tirkîya de zî vurîyayîşê demokratîkî bikerê. Êyê ke vera naye vindenê, peynîye de do vindî bikerê. No teqez o.”
Kalkanî bale ante ser o ke tayê hetî bi nameyê netewegirîye cehd kenê ke kurdan şaranê bînan rê dişmen bikerê û vat: “Kurdan seba ke dost nêdîyo, nêeşkenê pê şaran îttîfaq bikerê û çiqas ke hêzanê serdestan ra bawer kerdo vîyarteyî de vindî kerdo. Rojawanê kurdan seba ke ereban, tirkmenan, ermenîyan, sûryanîyan, çerkezan reyde têkilîye ronayî neteweya demokratîke Fîratê rojhelatî de xurt kerd, vindî nêkerd. Eynî xeta Fîratî rojawanî de nêeşkayî vila bikerê, nêeşkayî biresê Şam, Heleb, Sûrîyeya pêroyîne rê nêeşkayî biresê coka na encame reyde rî bi rî ameyî.”
Kalkanî derheqê şerê Amerîka-Îsraîl û Îranî de vat: “Nê şerî de serkewteyêk çin o. Ne rejîmê Îranî do sey verê xo dewam bikero ne zî hêrişê Amerîka û Îsraîlî ke hegemonya Îsraîlî wazena, do serkewte bibo. Îranêko newe ke hêzê demokratîkî aktîf ca gênê, do bêro ronayene.”
‘1ê Gulane de kurdî, cinîyî, ciwanî waran pirr bikerê’
Kalkanî derheqê 1ê Gulane de zî vat: “No 1ê Gulane muhîm o. 8ê Adare referandumê cinîyan bî. Newroze referandumê kurdan bî. 1ê Gulane zî şêno bibo referandumê kedkar û karkeran, referandumê sosyalîstanê demokratîkan, bibo referandumê merdimîye. Kurdî, cinîyî û ciwanî, kedkar û karkerî ganî 1ê Gulane de sey Newroze, sey 8ê Adare waran û kuçeyan pirr bikerê. Ez nika ra 1ê Gulane seba herkesî pîroz kena.”
