Hunermendanê TEV-ÇANDî bi dîmenê ke pare kerdê, şar dawetê Mîtînganê Azadîye kerd ke do seba azadîya fîzîkî ya Rayberê Şarê Kurdî Abdullah Ocalanî Amed, Wan, Mersîn û Stenbol de bêrê viraştene.
Hunermendê Endamê Têgêrayîşê Kultur û Hunerê Demokratîke ya Mezopotamya (TEV-ÇAND) yê Rojawanê Kurdîstanî Baran, Sumeyye Mihemed, Xalid Cûdî, Daniş Botan, Newroz Efrîn û Nesrîn Botan bi dîmenanê ke pare kerdê, şarê Vakûrê Kurdistani dawetê Mîtînganê Azadîye kerd ke bi waştişê azadîya fîzîkî ya Rayberê Şarê Kurdî Abdullah Ocalanî yenê viraştene.
‘Azadîya Rayber Apoyî bi estbîyayîş û azadîya cinîyan sereberz o’
Hunermend Baran mesajê xo de bale ante serê muhîmîya azadîya Rayberê Şarê Kurdî Abdullah Ocalanî û vat: “Azadîya Rayber Apoyî bi estbîyayîş û azadîya cinîyan serfîraz o, kulturê şarî yo û Komelê Kurd û Kurdîstanî yo.”
‘Ma azadîya Rayber Apoyî wazenê’
Hunermend Sumeyye Mihemed ard ziwan ke ê azadîya Rayberê Şarê Kurdî wazenê û vat: “Vengdayîşê ma seba heme şarê Kurdîstanî, hunermend û nuştoxan o ke wa tewrê Mîtînganê Azadîye bibê. Bijî û bijî Rayber Apo.”
‘Ma Rayber Apoyî azad bikerê, do heqê Kurdan zî garantî bikerê’
Hunermend Xalid Cûdî dîyar kerd ke şarê Kurdî bi vengdayîşê Rayberê Şarê Kurdî derbasê prosesê Aştî û Komelê Demokratîkî bîyo û vat: “Bi nê vengî ma derbasê qonaxêko bîn yê têkoşînê sîyasî û komelê demokratîkî benê. Azadîya Rayber Apoyî û heqê şarê Kurdî pîya girêdayeyê. Eke ma bieşkê Serok Apoyî azad bikerê, ma do bieşkê heqê şarê Kurdî bi rayanê demokratîkan garantî bikerê. Şarê kurdî û Tirkîya nê esasî ser o amadekarîya Mîtînganê Azadîye kenê. Ma hêvî kenê ke ma do nêzdî de Serokê xo mîyanê xo de bivînê. Ma zî sey hunermendanê TEV-ÇANDî yê Rojawanê Kurdîstanî bi girseyî û coşêka pîle şarî dawetê Mîtînganê Azadîye kenê.”
Hunermend Newroz Efrîn, Daniş Botan û Nesrîn Botan zî bi peyamanê xo dîyar kerd ke ganî mîtîngî bi coş û girseyî derbas bibê.
