HPG’yî Roşanê Ganîbîyayîşî 15ê Tebaxe pîroz kerd û wina vat: “Sere de Gerîlayanê Azadîye yê Kurdîstanî û şarê ma yê welatperwer, dînamîkanê Têkoşînê Azadîye yê Kurdîstanî heme ewro verê xo danê azadîya fîzîkî ya Rayber Apo.”
Merkezê Îrtîbatî yê Çapemenî HPG’yî derheqê serrgêra 15ê tebaxê yê 42. de eşkerayî daye.
HPG’yî destpêkê eşkerayî de di şexsê Fermandar Egîd (Mahsum Korkmaz) de heme şehîdê Kurdîstanî vîr ardî û wina vat. “Ma Roşanê Ganîbîyayîşê Neteweyî û serrgêra 42. ê Gama 15ê Tebaxe ya girde ke fermanê mergî yê Kurdan dirna, şerê estbîyayîşî û azadîye da dest pêkerdene û ganîbîyayîşê şarê kurdî caard, sere de rayber û afirînerê na gama tarîxî Rayber Apoyî rê keyeyanê erjaye yê şehîdanê xo yê bêmergî ke têkoşînê ma bi gonîya xo ya pîroze resnayê na roje, ro şarê ma yê kurdî yê welatperwer, dostanê ma yê ke çar hetanê dinya de paştî danê têkoşînê ma û ro hemrayîranê xo yê her ca de bi hawayêko fedaî têkoşîn danê pîroz kenê. Gama 15ê Tebaxê ya Namdare mîyanê nê şertan de virazîya ke ziwan, nasname û estbîyayîşê kurdan ameyene înkarkerene, erjê şarê kurdî heme ameyene talankerdene, Kurdîstan bi temamî binê îşxal û tarîyêka girane de bî. Gama tarîxî ya Rayber Apo ronayîşê PKK’yî, geşkerdişê adirê xoverdayîşê, bi hîrê çopê kibrîtî ke zindanê Amedî de hetê hemrayîr Mazlûm Doganî ra, xoverdayîşê çaran û geşbîyayîşê nê xoverdayîşî de şexsê Xoverdayaxanê 14ê Temmuze de bî bingeyê Gama 15ê Tebaxa 1984î rê. Seba parçekerdişê kolonyalîzmê giranî yê şarê kurdî ‘fîşeka verêne’ ya ke bi pêşengîya Mahsum Korkmazî 15ê Tebaxe de ameya teqnayene, şerê ma yê estbîyayîş û azadîye da dest pêkerdene û seba kurd û Kurdîstanî bî mîlad. Demêko ke zafînan xeyal zî nêkerdenê ke fîşeke bierzê îşxalkarî, kolonyolîzm û cuntaya faşîst ê 12ê êlule, destpêkerdişê çalakîyêka bi hawayî ya qehremanî û têkoşînê gerîla, seba şarê kurdî zî her hetî ra bî ganîbîyayîş û weriştişê serê lingan. Şarê ma bi îradeyê Rayber Apo xo weleya xo ra newe ra aferna, bi têkoşînê xo yê heqdar û meşrû zincîra koletîye visna, kanperestî wedarite û dest bi rayîrşîyayîşê qehremanî yê bêmabên kerde. Ma şexsê sembol û fermandarê pêşeng ê Gama 15ê Tebaxe hemrayîr Fermandar Egîd de şehîdanê xo hemînan bi hurmet û minet vîr anê, sozê xo tekrar kenê ke xeyalanê şehîdana xo biresnê ser kewtene.”
’15ê Tebaxe mudaxeleyêko tarîxî yo’
Eşkarîyaya Merkezê Îrtîbatî yê Çapemenî yê HPG’yî wina dewam kena:
“Gama 15ê Tebaxe tena çalakîyêka leşkerî yan zî gamêka pawitişî yê demî nîya. 15ê Tebaxe mudaxeleyêko tarîxî bî ke seracêrşîyayîşê şarê ke ver bi çinbîyayîşî şîne. Na game hetê xo yê neteweyî, îdeolojîk, sîyasî, komelî û kulturî bi qasê xo yê lekerî aver a. Verê heme çî weriştişê vera teslîmbîyayîşî û zincîra koletî ya ke mezgê kurdan de bî. Qereqolê ke kolonyalîzmî sereyê merdimanê kurdî de viraştî bî rijnayê, vist verê çiman ke kurdî û Kurdîstan heqîqeta ke nêbeno bêra înkarkerdene. Şorişê Ganîbîyayîşî her cayêko kurdî tede bî prosesê şorisgêrî yê fikrî, komelî û demkratîk xo reyde ard. Cinîyê kurdî yê azadî ke bi xoverdayîşê ganîbîyayîşî werişti bî payan bîyê pêşêngê cuya azade ke ewro zî cinîyanê dinya rê bîye îlham, wereyê xo pê anê û bi baldarî şopnenê. Nê averşîyayîşî ke hetê Rayber Apoyî ra sey ‘Şorişê mîyanê şorişî’ de ame pênasekerdene, xo reyde kurdêko newe ard ke her kes bi sereberzî wayîrê ci vejîyeno, merdimê kurdî yê azadî, ruhê Apoyî yê ke nêeşkeno bêro zeftkerdene, erjê berzî û hişmendîya Apoyî afirna. Eke ewro behsê erje kurdî, kurdîtîye, Kurdîstan û berzbîyayîşî nê erjî yeno kerdene, bêguman naye de Gama 15ê Tebaxe û têkoşînê ke bi şehadetê hezaran gerîlayan ame rayraberdene wayîrê rolêko dîyarker o.
Gerîla tu wext nêbî artêşêka pawitişî û şervananê rêze ra. Seba kurdî û Kurdîstanî bî nîşaneyê merdimanê kurdî yê newe û azad. Gerîla bi hunerê merdimî yê berzî yê kesayetê xo de afirna. Bi hîsanê xo yê fedakarîya girde, bi sozdarîya xo ya şar û welatê xo, bi têkoşînê xo yê astê qehremanîye de, bi îradeyê xo yê saxlem, hewldayîş û waştişê bêemsal, krîterê xo yê ciwîyayîşî bi hawayêko derwêşanê ya dûrê ezezî, bi durustî û fedakarîya xo ya bêşert zerrîya şarê ma de textê xo rona. No meşaleyo ke bi Gama 15ê Tebaxe ame tavistene bi hetê xo yê îdeolojîk û manewî komel ezezî ra bêçareyî ra û zeîfî ra xelasna; exlaqê komelî û fedakarî awan kerd ke serê krîterê komunal, hemrayîr û fedakarî ame ronayene. No manewîyato berz û vindertişo îdeolojîk seba şarê ma bi çimeyê hêzê yê esasî ke mîyanê şertanê tewr giranan de xo bipawo û hemverê hêrişan de tepîya game nêerzo.
Azadîya Rayber Apo zaf muhîm a ke dest tira nêyena veradayene
Bêguman esasê nê averşîyayîşan ê tarîxî, erjê berzî û têkoşînê bêeman de Rayber Apo esto. Rayber Apo afirînerê heme erjê komelî, îdeolojîk û merdimî yê têkoşînê ma yo, naye ra azadîya ey seba şarê ma û têgêrayîşa ma zaf muhîm a ke dest tira nêyeno veradayene. Na rastî ewro hetê heme dinya ra yena zanayene. Sere de gerîlayanê azadîye yê Kurdîstanî û şarê ma yê welatperwer, dînamîkanê Têkoşînê Azadîye yê Kurdîstanî heme ewro verê xo dayo azadîya fîzîkî ya Rayber Apo.
Her tewir nêzdîbîyayîş û cigêrayîşê ke vindertişê Rayber Apo û azadîya ey ya qetî xo rê nêkero esas û nê heqîqetî nêvînayîş ra bêro seba gerîla bêhukm o. Wesîyet û fermanê bi hezaran şehîdanê ma ke têkoşînê 27 serran ê vera sîstemê îşkenceyî yê Îmralîyî û Komployê Mîyanneteweyî de şehîd bîyî. Serê nê bingeyî de yê. Her şehîdêke ma bi vateye ‘Bijî Serok Apo’ nefesê xo yê peyên dayo. Sey gerîlayanê azadîye ke şopdaranê şehîdan ê, ma dîyar kenê ke heta caardişê azadîya fîzîkî ya Rayber Apo xoverdayîşê ma yê gerîla û têkoşînê şarê ma do bi her rayîr û metodî bêmabên û bi qerardarî dewam bikero.
Bi na hêvî, bawerî û qerardarîya serkewtişî ma Roşanê Ganîbîyayîşî 15ê Tebaxe reyna pîroz kenê û bi nê munasebetî sozê xo newe kenê ke rayraşîyayîşê xo yê ‘Rayberîya Azad, Kurdîstano Azad’ qetî biresnê ser kewtene. Bi dest pêkerdişê serra 43. ê têkoşînî ra ma hemrayîranê xo hemînan, şarê xo yê welatperwer ê ke zerrîya înan bi Rayber Apo pirodano, têkoşînî înan de serkewtene ke girde wazenê.”
