Platformê Weşîye yê Amedî çarçewaya 15ê Gulane Cejna Ziwanê Kurdkî eşkerayî daye û bale ante serê astengîyanê vernîya xizmetanê weşîye yê bi ziwanê dayîke û dîyar kerd ke heqê weşîye yê bi ziwanê dayîke tena waştişêk teknîkî nîyo, heqêko neteweyî, komelkî û kolektîf o.
Platformê weşîye yê Amedî çarçewaya çalakîyanê Roşanê Ziwanê Kurdkî de vernîya Nêweşxaneyê Cigêrayîş û Perwerdeyî yê Gazî Yaşargîl ê Amedî de eşkerayî da. Eşkerayî de pankartê “Tendurîstiya bi zimanê zikmakî hilma jiyanê ye” ame akerdene bi slogananê “Bê ziwan weşîye nêbena” , “Ziwanê ma rûmetê ma yo” ame berzkerdene.
Sere de Sekreterê Odaya Doktoran ê Amedî Muhamed Can bi kirmanckî qisey kerd û qalê Kovara Hawarî û îlankerdişê 15ê Gulane Roşanê Ziwanê Kurdkî kerd û wina vat: “15ê Gulanê Celadet Elî Bedîraxanî ra ma rê mendo, tarîxê na roje ma bizanê ma do qîymet bidê na roje. Celadet Bedîrxanî seba Kurdkî tîpê latînkî afirnayê. Kovara Hawarî 15ê Gulane de ameye çapkerdene. Naye ra ma 15ê Gulane xo rê kerdo roşan. No gure tena seba ma kurdan est o. Ma est ê la ziwanê ma çin o. Wexto ke ez nêweşxane de qisey kena kesêko ke cewab bido mi çin o. Ez şina wendegeh ziwanê mi çin o, ez şina ça ziwanê mi çin o. Serre ameya 2026 ez sera şina ziwanê mi çin o, ganî ma pî û dayîkanê xo reyde bi ziwanê xo qal bikerê. No gure seba yew almanij, îngîlîz û fransiz de çin o la seba kurdan tena est o. Ma seba aye xebate kenê ma wazenê ziwanê ma heme cayan de pere bikero. La vizêr ney perey Kocaelî de seba ke cayê werdî de menuyê werdî kerdo kurmancî û zazakî, rastê herişê faşîstan ame. Ma vanê şima geber bibê zî ma do bi ziwanê qisey bikerê.
Ganî ma her ca de bi ziwanê xo qisey bikerê
Heta ma bimirê zî ma do xebata xo bidomnê. Ma hevalanê xo ra şarê xo ra vanê her ca de bi ziwanê xo qisey bikerê. ziwanê ma sey şitê dayîkanê ma helal o û ganî her kes ziwanê bimuso. 20 mîlyonî kurdî est ê û wazenê bi ziwanê xo qisey bikerê, şinê nêweşxane şinê banka wa bi ziwanê xo qisey bikerê. Ma qisey nêkerê kes qisey nêkeno, vanê ma zazakî û kurmancî bimusê çi karê ci ma rê est o ? xebata ma seba pereyan nîya seba estbîyayîşî ya. Ma vanê ma est ê la ziwanê ma nêbo ma zî nêbenê. Ma ziwanê xo nêzanê ma do vîndî bibê, şarê ma koyê ma do vîndî bibê. Dewê ma nameyê înan zazakî yê wa nameyê înan zazakî bo. Çiqas îngîlîzkî û tirkî est ê wa hende zî kurmancî û zazakî bibo. Ma çîyêko zêde nêwazenê. Na roje ma rê bîya roşan ganî her ca de ma ziwanê xo qisey bikerê.”
Badê qiseykerdişan eşkerayî bi vilakerdişê vilawekanê seba ziwanî û bi vatişê sloganan qedîyaye.
