Hemserekîya Konseya Rayberdişî ya KCK’yî semedê vefatê kedkarê Çapemenîya Azade Huseyîn Aykolî dejê xo ard ziwan û keyeyê ci, camîaya çapemenîye û şarê kurdî rê serweşîye waşte.
Hemserekîya Konseya Rayberdişî ya KCK’yî semedê rojnameger Huseyîn Aykolî ke dinyaya xo bedilnaye, mesajê serweşîye pare kerd.
Eşkerayîye de nê ameyî parekerdene:
“Kedkaranê Çapemenîya Azade ra rojnameger Huseyîn Aykolî nêweşxane de ke tede tedawî dîyêne, dinyaya xo bedilnaya. Dekewtişê serra newî de semedê na xebere ma zaf qehrîyayî. Vefatê merdimê wînayênî ke emrê xo semedê wayûbiratîya şaran û têkoşînê demokrasî û sosyalîzmî da, bêşik dejo pîl o. Sere de keye û merdimê ci ma camîaya çapemenîye, şarê kurdî û heme şaranê Tirkîya rê serweşîye wazenê.
Averşîyayîşê çapemenîya kurdan de keda Huseyîn Aykolî zaf a. O bîyo qelemêka xoverdayox û kedkere ya tradîsyonê çapemenîya azade. Rixmê zordarîyanê girdan û bêîmkanîyan, vera zext û hêrişan tewirê xo yo xoverdayîşî canêverda, pêardişê tradîsyonê Çapemenîya Azade bêmabên heta roja ma rolo pîl kay kerd, bi serkêşanê naye ra yew. Reyna dinya û Tirkîya de rojdemkerdişê neheqîye û hêrişê vera şarê kurdî de rolo muhîm ê Huseyîn Aykolo erjîyayeyî est o. Bi têkoşîn û keda xo têkoşînê demokrasî yê Tirkîya û têkoşînê azadîye yê şarê kurdî de rolêko muhîm girewt. Rayber Apoyî zî seba ke rewşa Huseyîn Aykolî girane bîye dejê xo ardbi ziwan û pêvînayîşan de rewşa ci persayêne.
Ma reyna dejê xo yê pîlî anê ziwan, keye, merdim û dostan û camîaya çapemenîye û şarê xo rê serweşîye wazenê. Ma pê bawerê ke şarê ma û Çapemenîya Azade do wayîrê vîrameyîşê Huseyîn Aykolî yê erjîyayeyî bivejê.”
