Deyîrbaz Mucahît Goker derheqê proseso peyênî de qisey kerd û dîyar kerd ke eke aştî biba hem seba kurdan hem zî seba tirkan baş beno.
‘Acaba do bireso ça’
Deyîrbaz Mucahît Goker îfade kerd ke no proses seba ke do vernîya hesiranê dayîkan bigîro, zaf muhîm o û wina vat: “No mişewre (proses) hetê aşitî, gonî nêriştiş, çimanê dadîyan ra hesirî nêrê war, nê hetî ra zaf muhîm û zaf erjîyaye yo. La heta nika çi sebeb ra yo ez nêzana hema şuxilîyayîşê nê prosesî ra zerê însanî rehet nîya. Ma pê şik kenî ke acaba do bireso ça?
Hetêk ra hende însan ha zere de, hende însan zere de neweşîyanê giranan ancenê. Aştî biba, heqê kurdan yê kultur, huner, ziwanê ma ser o na bindestî wedarîya hetêk ra avêrşîyayîşêk hol beno. Ma hema nêeşkenê serbest pê ziwanê xo xeber bidê, pê ziwan xo cayanê resmîyan de, meclisî de bidim şixulnayene. Wextok ma şixulnenê yê vanê ‘Pê ziwano ke nêno zanitene qal kerd.’ Name nêeşkenê panê.
‘Ganî ma derheqê xo de qeraran bidê’
Mekteban de, badê mekteban de bieşko pê ziwanê xo xo îfade biko, pê ê ziwanî îdareyê xo biko. Her hetî ra na aştî bêra meydan hem semedê ma kurdan hem zî ziwanê ma kirdkî, kurmanckî hem zî semedê tirkan zî eynê şikil rehetî bena.
Nê hetî ra hêvîya mi kêm a. Hetêk ra zî goreyê pîvananê demokrasî ganî ma bieşkê heqê xo de qerar bidê. Hemvelatîya têduştîye naye wazena. Yanî eke avêrşîyayîşê ziwanê ma mumkin o, ganî ma naye ser o qerar bidê. Pê qerar sewbîna mercîyan, pê qerarê Amerîka û nêzana sewbîna dewletan yan zî Tirkîya de kamo ke îqtîdar de ro, pê qerarê înan ganî nêbo. Nê qeraran ganî ma bidê. O qerar zî pê zerrîweşî bena.”
