DGD-KONî vera dardakerdişanê Rejîmê Îranî eşkerayîyêka nuştekî vila kerd û dîyar kerd ke Rejîmê Îranî bi hawayêko eşkere û sîstematîk sîyasetê cîyakerdene vera şarê kurdî domneno û vat: “Ganî vengê Naser Bakrzadeh û heme girewteyanê sîyasî yê kurdan bêro eşnawitiş û heme qerarê dardekerdişî bilez bêrê vindertiş.”
Konfederasyon û Platformê Komalanê Rojhelat û Başûrê Rojhelatî (DGD-KON) vera hêriş û dardekerdişanê rejîmê Îranî yê ke vera şarî kurdî domneno, eşkerayîyêka nuştekî vila kerd.
DGD-KONî eşkerayî bi sernameyê “Îranî de dardekerdiş û tedayê sîstematîk ê Rejîmî Molla ke şarê sîvîlî ser o bi hewayêko huşk yenê rayraberdene, nênê qebulkerdene” pare kerd û da zanayîş ke rejîm, teda, îşkence û dardekerdişê sîvîlan û şarê kurdî ser o ferz keno. Dewamê eşkerayî de DGD-KONî caardişê ke yenê rayraberdene bi hawayêko huşk şermezar kerdê û wina vat: “Tarîxî ra yeno zanayîş ke rejîmê otorîterî ke nêeşkenê problemanê xo yê mîyanênan çareser bikerê, bi huşk û terorê dewlete vera şarê xo wurzenê. Rejîmê Molla yê Îranî zî bi serran o bi eynê politikayanê barbaran estbîyayîşê xo domnenê; bi hawayêko eşkera û sîstematîk sîyasetê cîyakerdene vera şarê domneno û heme heqanê tewr bingehînan ê merdîmîye zî binpay keno.”
‘Rejîm teda, îşkence û dardekerdişan zêde keno’
Dewamê qiseykerdiişê xo de DGD-KON’î da zanayene ke 3-4 serranê peyênan de bi taybetî ciwanan ser o girewtiş, îşkencekerdiş û qeraranê dardekerdişî yê rejîmê mollayan zêde bîyê û wina domna: “Nê hedîseyî takekesî nîyê, sîyasetêko fermî, plankerde û sîstematîk ê dewleta Îranî yo. Nimûneyanê tewr peyênan ra yew Naser Bakrzadeh o ke hîrê serrî yo zindanê Urmîye de îşkenceyanê hovane reyde rî bi rî mendo û nika cezaya dardekerdişî reyde ameyo rî bi rî verdayene.”
‘Dardekerdiş sucê merdimîye yo, bêvengî zî hemkarî ya’
DGD-KON’î eşkerayîya xo de vera kerdişanê Rejîmê Îranî reaksîyon mojna û wina vat: “Pratîkê dardekerdişî, îşkence û cîyakarî yê rejîmê Molla sucê vera merdimîye yê. Bêvengîya hemverê nê sucan rasterast hemkarîya înan reyde ya. Ma komelê mîyanneteweyî, rêxistinanê heqanê merdiman, sazgehanê demokratîk û heme kesanê wayîrê wîjdanî yê, bi huşk venga înan danê ke bilez têbigêrê. Ganî vengê Naser Bakrzadeh û heme girewteyê sîyasî yê kurdî bêro eşnawitene û heme qerarê îdamî bilez bêrê vindarnayene.”
‘Ma do vera sucan çimanê xo nêgîrê’
Peynîya eşkerayîya xo de DGD-KON’î vengdayîşê vindarnayîşê kerdişanê teberê merdimîye kerd û wina vat: “Bi lez û bez nê sîyasetî hovane yê dardekerdişî vindarnê. Polîtîkaya cîyakarîya neteweyî ya vera şarê kurdî û heme şaranê bînî ra fek veradê. Sîstemê zalimane ra fek veradê û sîstemêko ke bingeyê edalet, têduştî û qanûnî awan bikerê. Eke şima ewro zî dewam bikerê, bedêlê ey tena kesî nê do wijdanê merdimîye yo pêroyî bido. Ma do qet bêveng nêmanê. Ma do nê sucan rê çimanê xo nêgîrê. Ma do her tim kîşta ê kesan de bibê ke, seba azadîye, rûmet û heqanê xo têkoşîn danê û vengê înan berz bikerê.”
