Îlham Ehmed û Fesla Yûsif derheqê Konferansê Yewrêzî û Yewhelwêstê Kurdî de vat ke ganî estbîyayîşê heqanê cinîyan destûr û ameyoxê cinîyan ê Sûrîyeya newa de bêrê garantîkerdene.
Konferansê Yewrêzî û Yewhelwêstê Kurdî yê Rojavayê Kurdîstanî de bi beşdarîya zêdeyê 400 kesan ke Rojava, Vakûr û Başûrê Kurdîstanî ra ameyî, ame kerdene. Bi beşdarîya xeylê cinîyanê tevger û rêxistinanê cîya cîyayan, kesayetanê cayê cîya cîya yê Sûrîye ra roja 26ê nîsane Parka Azadî ya şaristanê Qamişlo de beşdarê nê konferansê tarîxî bîyê. No konferanso de ke hetê kurdanê çar hetê dinya ra pê dîqet û heyecanêko gird ame taqîbkerdene, muhîmîya hemserekîye ser o zaf munaqeşeyî ameyî kerdene. Konferansî de têduştîya cinî û camêrdan ser o munaqeşeyî ameyî kerdene û zaf fikiranê ke cinî sistemê Sûrîye de pê fikir, veng û nasnameyê xo bêrê şinasnayene, vejîyayî orte.
Hemserekaya Dayîreyê Têkilîyanê Teberî ya Rayberîya Xosere ya Demokratîk a Herêma Vakûr û Rojhelatê Sûrîye Îlham Ehmed û endama Desteya Serekîya Encumena Niştîmanî Kurdî ya Sûrîye Fesla Yûsif derheqê Konferansê Yewrêzî û Yewhelwêstê Kurdî de ajansê JINHA rê qisey kerd.
‘Yewbîyayîş, beşdarî û vengê cinîyan konferansî de gamêka tarîxî ya’
Hemserekîya Dayîreyê Têkilîyanê Teberî ya Rayberîya Xosere Demokratîk a Herêma Vakûr û Rojhelatê Sûrîye Îlham Ehmed derheqê Konferansê Yewrêzî û Yewhelwêstê Kurdî û amadebîyayîşê cinîyan ê konferansî bale ant zêdebîyayîşê hûmara cinîyan ê konferansî ser o û wina vat: “Konferansê Yewrêzî û Yewhelwêstê Kurdî de zêdeyê 400 kesî rêxistin, kesayetê xoserî, cinî û ciwanî amade bîyê. Nuqteyê ke seba cinîyan ameyî munaqeşekerdene, verê cû belgeyî de est bî. Belgeyî de ame vatene ke seba ameyoxê Sûrîye zî gamî seba beşdarbîyayîşê cinîyan ê komîteyê dîyalogî ganî bibê û waştişan de heqê cinîyan bibê. Na game Sûrîye de bena tecrubeya newîye. Çunkî hende cinî Sûrîye de est ê, la heta ewro çareserîyanê sîyasîyan de hem zî rayberî û destûr de bêpar ê. Seba ney, yewbîyayîş, beşdarbîyayîş û vengo ke cinîyan nê konferansî de da, seba ameyoxê Sûrîye gamêka tarîxî ya.”
‘Cayê keyfweşî bî ke heme hetî amade bîyê’
Îlham Ehmed bale ant beşdarîya zaf rêxistin û tevgeran ser o ke konferansî de amade bîyê û wina dewam kerd: “Cayê keyfweşî bî ke heme hetî nê konferansî de amade bîyê. Her kesî mesaj, fikir û hêvîyê xo seba piştgirîya şarê Kurdî nîşan da. Na bi serê xo tarîxê kurdan de gamêka newa ya. Rojava ameyoxî de wayîrê rolêko tarîxî yo. Gama yewine seba yewîya kurdan û çar parçeyê Kurdîstanî de bingeyê aye awan kerd.”
‘Ganî Kurdî seba girewtişê heqanê xo bibê yew’
Endama Desteya Serekîya Encumena Niştîmanî Kurdî ya Sûrîye Fesla Yûsif zî na gama tarîxî pîroz kerd û vat: “Ewro rojêka tarîxî ya, roja yewhelwêstê Kurdî ya. Zaf kar û xebatî seba na roje ameyî kerdene. Ma sipasîya heme kesanê ke piştgirîya nê konferansî kerda, kenê. Encamê ke kewenê xizmetê şarê ma, muhîm ê. Bêguman lazimtî est bî, na qonax de na konferans bêro organîzekerdene. Çunke Sûrîye qonaxêka newîye ra vîyarte. Her wina Rojhelatê Mîyanênî de zî zaf vurîyayîşî benê. Ma zî sey şarê Kurdî do xo bikê yew, seba ke heqanê xo bigîrê.”
‘Destûro newe yê Sûrîye de ganî heqê cinîyan bibê’
Fesla Yûsif bale ante rolê cinîyan ê Sûrîye ser o ke waştişê viraştişê ameyoxî de heqê cinîyan Sûrîyeya newa de kerde û wina qedêna: “Rolê cinîyan zaf muhîm o. Nê konferansî de bi desan cinî amade bîyê. Fikrê înan zî zaf eşkera û zelal bîyê. Şorişo ke ame kerdene, bi pêşengîya cinîyanê Kurdan bî. Destpêkê şorişî ra heta ewro cinî pêşengê komelî yê. Pê xeyrê destkewteyanê cinîyan ma do biresê azadîya heme cinîyanê dinya. Ma dewaya cinîyanê kurdan rê serkewtiş wazenê û waştişê heqê cinîyan ê destûro newe yê Sûrîyeya newa de kenê.”
