Endamê Meclîsê Dayîkanê Aştî û welatijan derheqê vengdayîşê Rayberê Şarê Kurd Abdullah Ocalanî de dîyar kerd ke ê wayîrê vengdayîşî vejîyenê û vat ke seba aştî biba ganî dewlete zî gamanê şênberan bierza û aştîye menda bikera.
Rayberê Şarê Kurd Abdullah Ocalan 27ê sibate de vengdayîşêko tarixî bi nameyê “Vendayîşo Aştî û Komela Demokratîke” kerd û vengdayîşî ra pey zî PKK’yî qerarê adirbestî girewt. Vengdayîşê tarixî yê Abdullah Ocalanî Kurdîstan û dinya de vila bi û hema zî tesîrê xo dewam kenê. Dima ke PKK’yî adirbest îlan kerd ê wextî ra yo prosesê ser o munaqaşayî hîna zaf bîyê. Meclîsê Dayîkanê Aştî yê Şirnexî û welatijanê Şirnexî derheqê vengdayîşê tarixî de Ajansa Welat rê qisey kerd.
‘Wa aştîyêka menda biba’
Welatijan ra Tamer Karakan ard ziwan ke vengdayîşê Rayberê Şarê Kurd Abdullah Ocalan tarixî yo û wina vat: “Ganî her kes wayîrê vengdayîşî vejîyo. Ganî dewlete zî cewab bida nê vengdayîşî û gamanê şênberan bierza. Seba ke proses bireso netice ganî azadîya fîzîkî ya Abdullah Ocalanî bêra ca. Ganî heme girewteyê sîyasî bêrê veradayene. Reyna ganî dewlete hêrişanê xo yê Vakûr û Rojhelatê Sûrîye û Başûrê Kurdîstanî ser o bivindarna. Ganî dewlete zî nê gaman bierza ke no şer vindaro û aştîyêka menda bêra ca. Ma zî do wayîrê vengdayîşî vejîyê.”
‘Ganî dewlete zî game bierza’
Endama Meclîsê Dayîkanê Aştî Emîne Alkiş zî dîyar kerd ke ê sey dayîk bi serran o dewaya aştî kenê û nê çîyê ardî ziwan: “Vengdayîşê birêz Abdullah Ocalanî zaf muhîm o. Ganî her kes piştî bido nê vengdayîşî. Ganî dewlete zî game bierza. Bi kayan no proses nêreseno netîce. Ma dewaya heqanê xo kenê. Wa ma pêro bibê seyyewbîn û aştîyêka menda biba. Eke dewlete game nêerza no proses nêşono sere. Ma do hemverê kayan ê.”
‘Ma wayîrê vengdayîşî vejîyenê’
Welatija bi nameyê Şîrîn Demîr zî derheqê vengdayîşê Abdullah Ocalanî wina qisey kerd: “Ma wayîrê nê vengdayîşî vejîyenê. Ma hêvî kenê ke nê vengdayîşî ra pey prosesêko weş dest pêbikero. No vengdayîş do bibo gama aştî û azadîye. Ma wazenê birêz Abdullah Ocalan bi hewayêko fîzîkî azad bibo û heme zindanî veng bibê.”
‘Ma nêwazenê êdî zerrîya dayîkan biveşa’
Dayîkanê Aştî ra Hatîce Batûr zî dîyar kerd ke ê seba nê prosesî zaf hêvîdar ê û vat: “Hêvîyê ma zaf pîl î. Ma hêvîdar ê ke no proses bibo prosesê aştî û azadîye. Ma vengdanê heme dayîkan zî wa wayîrê prosesî vejîyê. Wa dayîkê kurd û tirk yebînan virar bikerê û aştîyêka menda biba û şer vindero. Ganî hêrişê ke Rojawanî ser o yê vindarê. Aştî tena bi hetêk nêbena ganî her di hetî zî goreyê prosesî têbigêrê û emserre biba serra aştî û azadîye. Zerrîya ma zad veşeya. Ma nêwazenê êdî zerrîya dayîkan biveşa. Wa dewlete zî hêrişanê xo vindarna. Wa birêz Abdullah Ocalan bi hewayêko fîzîkî azad bibo û berê zindanan abê. Ma heme seyyewbîn pîya biciwîyê, waştişê ma tena no yo.”
Welatîyan ra Salîh Yilmaz zî ard ziwan ke ganî dewlete zî gamanê şênberan bierza û wina vat: “Ma wazenê aştî û seyyewbînîye biba. Ma şer nêwazenê. Heta key na gonî do biherikîya. Êdî bes o, ma wazenê na gonî vindara. Wa berê heps û zindanan ab û dewlete zî gamanê şênberan bierza.”
