Cerdevanê ke dewa Şerefîye ra yê Koyê Gabarî de bi destûrê Mudirîyetê Daristan û Zîretî talan kenê. Çimeyê ke ma tira bawer ê dîyar kerd ke Mudirîyetê Daristan û Zîretî cerdevanan ra bertîl gêno.
Serra 2019î ra heta nika bi mîlyonan darê daristanê Şirnexî de bi ortaxîya hêzanê dewlete û bi destê cerdevan û kesanê terefgirê dewlete yenê birnayene. Her roje dîmenê daristananê Herêma Besta, Koyê Cûdî û Gabarî resenê destê Çapemenîya Azade. Destpêkê talanê daristanan ra heta nika bi seyan xeberî hetê Çapemenîya Azade ra ameyê viraştene la her roje talanê xozaya Şirnexî hîna zaf beno.
Dîmenê ke vizêr hetê çimeyanê herême ra ameyê destê ma, yê dewa Şerefîye yê Herêma Haranî ya Şirnexî yê. Dîmenan de aseno ke çend kesî bi traktoran kewtê mîyanê daristanî û ey talan kenê.
Dîmenê ke vizêr hetê çimeyanê herême ra ameyê destê ma bi sereyê xo xeberêka cîya ya. La. Sey Ajansa Welat ma wazenê hîkayeya dîmenan ke hetê çimeyanê ma ra senî resayê destê ma, wendoxanê xo û xozapawitoxan reyde pare bikerê. No çimeyo ke bi xo xozapawitox o, verê ke dîmenan ma rê bierşawo, ewile vano ‘Seba ewleyîya mi ganî şima teqez nameyê mi nêdê’ û dima ra zî dîmen û fotografê talanî erşaweno. Çimeyê ke benê şahidê talanê nê talanker û kesanê destûr danê înan baş nas kenê. Sewbîna talanî de kayê senî yenê kaykerdene zî baş zanê. La seba ewleyîya xo nêwazenê nê agahî bêrê parekerdene.
Gabar de kam, senî talan keno?
Goreyê cigêrayîşanê ma û agahîyanê ke çimeyanê ma dayê, dewa Şerefîye de cerdevano verên Bahattîn Kural ke nika teqawit bîyo û cerdevanê bi nameyê Mahmut Vural û Mehmet Nurî Vıral seba birnayîşê daran vanê ‘erdê ma bi tapu yo’ muracatê Mudirîyetê Daristan û Zîretî yê Şirnexî kenê. Nê waştişê cerdavanan ser o Mudirîyetê Daristan û Zîretî yê Şirnexî seba birnayîşê daran aşmêk destûr dano nê kesan. Dima ke destûr ameyo girewtene, nê cerdevanan karkerê birnayîşê daristanan dîyê û vizêr dest bi talanî kerdo.
Mudirîyetê Daristanî bertîlî gêno
Goreyê agahîyanê ke ameyê girewtene nê heme hîrê cerdevanî eynê wextî de sey axayê dewe yê û erdo ke vanê ê ma yo, erdê ê dewijan o ke serranê 90î de koç kerdo metropolan. La nê kesê hêzê dewlete danê paştîya xo û nê erdan ser o talan kenê. Sewbîna bertîlêko baş danê nê kesanê ke Mudirîyetê Daristan û Zîretî de xebitîyenê û bi nê hewayî karê xo rayra benê.
Mudirîyetê Daristan û Zîretî: Ma destûr dayo
Bi rayîrê telefonî ma xo resna rayedaranê Mudirîyetê Daristan û Zîretî yê Şirnexî û ma persê, ‘Şima destûrê birnayîşê daristananê dewa Şerefîye dayo kamî?’ kerd. Rayedaran bi hewayêko pozîtîf cewab da persê ma û vat înan bi rayîranê fermî destûrê nê çîyî dayo.
