Herêma ramitişî ya başûrê Etîyopya de rîyê varanî zafî ra laser werişt û hezaz virazîya. Netîceyê felaketî de 52 kesî cuya xo ra bîyê û 95 kesî zî vîndî bîyê.
Herêma Gamo ya başûrê Etîyopya de varanêko zaf zêde vara. Semedê varanê zafî ra laser werişt û hezaz virazîya. Goreyê ofîsê dewlete yê herêma Başurê Etîyopya 3 qezayan de tewr tay 52 kesî cuya xo ra bîyê û 95 kesî zî vîndî bîyê. Eşkerayî de ame dîyar kerdene ke seba vînayîşê kesanê vîndîbîyeyan xebatêka hîra ameya dest pêkerdene.
Rayberîya herême eşkera kerd ke varano çetin bi taybetî cayanê berzan de zerarêko girs viraşto û semedê laser û hezazî xeylê awanî rijîyayê. Gamo seba taybetîya cografyaya xo ko yo û herra ci nerm a, sey herêmêka seba felaketanê xozayî bitehluke yeno vînayene.
Rojanê peyênan de varano çetin pêroyê Rojhelatê Afrîka de xeylê welatan de bîyo sebebê felaketan. Paytextê Kenya Nairobî de hewteyo vîyarte de rîyê felaketê laserî ra tewr tay 49 kesî cuya xo ra bîyê.
Pisporî vanê ke serebûtê hewayî yê çetinî, semedê vurnayîşê îklîmî zêde benê.
