Têgerayîşê Fanosê Azadîye yê Cinîyan ê Efxanîstanî, seba sergêra pancine ya reyna îktîdarbîyayîşê Talîbanî vengdayîşê tewrbîyayîşê çalakîyanê protesto û paştîdayîşî kerd û komelê mîyanneteweyî rê vengdayîş kerd ke wa vengê cinîyanê Efxanîstanî berz bikerê.
Têgerayîşê Fanosê Azadîye yê Cinîyan ê Efxanîstanî, eşkerayîya de ke vila kerd seba 15ê tebaxe ke sergêra pancine ya reyna îktîdarbîyayîşê Talîbanî ya vengdayîşê tewrbîyayîşê çalakîyanê protesto û paştîdayîşî kerd. Têgerayîşî cinî, camêrdî, pawitoxê heqanê merdiman û dezgehê komelê sivîlî dawetê paştîdayîşê çalakî û kampanyayan kerd û waşt ke vengê cinîyanê Efxanîstanî biresnê komelê mîyanneteweyî.
‘Paştîdayîş her wextî ra hîna muhîmêr o’
Eşkerayî de ameye dîyarkerdene ke 15ê tebaxe tarîxê Efxanîstanî de destpêkê serdemêko zehmet o û nê tarîxî ra dima bi mîlyonan cinî û kênekî heqanê xo yê bingeyênan ê sey perwerde, xebat, azadî û tewrbîyayîşê cuya komelkî ra bêpar ameyî verdayîş. Vengdayîşî de ame îfadekerdiş ke paştîdayîşê cinîyanê Efxanîstanî ewro her wextî ra hîna muhîmêr o, welatîyî, qeydeyê komelê sivîlî û dezgehê heqanê merdiman ameyî dawetkerdiş ke tewrê programanê protestoyî bibê û mesajê azadî, edalet û seypêyî biresnê komelê mîyanneteweyî.
‘Gamanê hîna xurtan bierzê’
Têgerayîşî sewbîna komelê mîyanneteweyî ra waşt ke Efxanîstan de polîtîkayê vera cinîyan sey “apartheîdê zayendî” pênase kerdê û seba qedênayîşê nê polîtîkayan gamê hîna xurtî bêrê eştiş. Peynîya eşkerayî de heme hetan rê vengdayîşê bi vindertişê kîşta cinîyanê Efxanîstanî de û pawitişê azadîye, edalet û rumetê merdimî ame kerdiş.
