Ayşe Şan deyîrbazêka nimûne ya, çimkî hetêk ra keyeyê aye ra hetêk ra zî pergalî aye rê zilm û teda kerd. Ayşe Şan verba zîhnîyetê zilmkerd de xover da û bîye Eyşana Kurdî
Ayşe Şan deyîrbazêka Kurd a, bi nameyanê Eyşana Kurd, Eyşe Xan, Eyşana Elî yena şinasnayîş. Sey kênaya deyîrbazêkî Amed de ameye dinya la şaristanê Dîlok, Îstanbul, Almanya û Bexda û tewr peynî zî Îzmîr de ciwîyaye. Bi vatişê deyîranê Tirkî û Kurdî radyoyan de xebitîya, konserî dayî û kasetî viraştî. Keyeyê aye nêwaşt ke a muzîkî reyde elaqedar biba, tena maya aye babeta muzîkî de hetkarî da aye.
Wesîyetê aye o bî ke eke rojêk şêra heqîya xo ser a do agêra Amed la çi heyf ke wesîyetê aye nêame bi ca. Almanya de aye domanêk kerd vindî û dima 3 domanê aye bîyê.
Bêçare koç kerd
Seba ke keyeyê aye nêwaşt ke a muzîkî reyde elaqedar biba, aye bêçare Amed ra koç kerd Dîlok. Seba ke deyîrê Kurdî qedexe bîy, bêçare deyîrê Tirkî vatî. Serra 1963î de problemanê ekonomîkan ser o Dîlok ra koçê Îstanbulî kerd. Îstanbul dest bi deyîranê Kurdkî û Tirkîyan kerd. Sifte bi deyîra “Ez Xezal im” namdar bîye. Peynî zî kasetê xo yo yewin o Kurdkî û Tirkî vet. Namdarbîyayîşî ra pey seba ke teda û zilm zêdîyayê, naye ser bêçare na reye Tirkîya ra koçê Almanya kerd û uca de çi heyf ke 18 aşman kêna xo Şahnaze vindî kerd.
Dima 3 domanê aye bîyê û agêra Îstanbul, seba ke deyîranê kurdkîyan vana, yew het ra keyeyê aye yew het ra zî hêrîşê pergalî dest pêkerd. Serra 1979î de şîye şaristanê Bexda yê Iraqî û uca de Radyoyê Vengê Bexda de bi nameyê Eyşana Elî vengê namdarîye ard. Şaristanê Bexda, Musul, Hewlêr û Duhok de konserî daye.
Çi heyf ke 18ê Kanuna 1996î de Îzmîr de nêweşîya ganwerî (kanser) ra ver şîye heqîya xo. Aye zaf waşt Amed de defîn biba labelê keyeyê aye destûr nêda ke a Amed de defîn biba. Goristanê aye nika Îzmîr de yo.
