Qezaya Pasûrî ya Amedî de welatijê dewanê Cixsê, Xuruç, Tiyaks û Buduka ver aprojeyê santralê enerjîyî yê tije yo ke yeno plankerdene, reaskîyon mojnenê.
Qezaya Pasûrî ya Amedî de welatijê dewanê Cixsê, Xuruç, Tiyaks û Buduka ver aprojeyê santralê enerjîyî yê tije yo ke yeno plankerdene, reaskîyon mojnenê. No projeyo ke do qadêko 25 hektar 30.909 panelanê tîje reyde bêro kerdene, hetê şîrketê VBZ’yî ra yeno averberdene û Wezaretê Dorûver û Şaristanwanîye ra raporê Erjnayîşê Tesîrê Cugehî yê Pozîtîfî girewto. Labelê dewijî vanê ke no santral do çeregehanê înan ê hempar talan bikero û tesîrêko negatîf çimeyanê awe ser o bikero.
‘Ma do şîrê ça?’
Dewijî ke debara xo bi weyekerdişê heywanan kenê, dîyar kenê ke no proje do cuya înan a dewe çin bikero. Hecî Nurîye ke dewija dewa Buduka ya wina vana: “Eke weyekerdişê heywanan biqedîyo, ma do şîrê ça? Verê ma danê şaristanî la uca de ma do senî biciwîyê?”
Seba pawitişê dewa xo platform awan kerd
Dewijan endîşeyê xo yê radyasyono ke belkî vila bibo, ey ser o zî îfade kerdê û vat ke no do weşîya înan û heywanan ser o bi tehluke bo. Proje tena 48 metre dûrî dewe de yeno plankerdene û no zî tehlukeyî vêşî keno. Dewijan Platformê Pawitişê Dewa Buduka awan kerdo û sazgehanê ekolojîyî reyde mîyanê dayîşûgirewtişî de yê.
Sazgehê Amedî piştgirî danê dewijan
Komela Ekolojîyî ya Amedî û TMMOB zî piştgirî danê înan. Reyna Baroyê Amedî vera proejeyî dewa akerda û wazeno raporê Erjnayîşê Tesîrê Cugehî bêro betalkerdene. Serekê Komîsyonê Derûdorî yê Baroyê Amedî avûkat Ahmet Înanî qerarê wezaretî wina rexne kerd: “Nê raporî bi sextekarî yenê amadekerdene; fotograf û agahîyê şaşî yenê şuxulnayene la sazgehê fermî nînan qebul kenê.”
Dewijê dewan qerardar ê
Cigêrayîşê Komela Ekolojî ya Amedî de ame dîyarkerdene ke no proje do tekane çeregehô fonksîyonel ê dewa Buduka ser o yeno plankerdene û do dest bido hewz û çemanê herême ser o. Dewijî vanê ke projeyî bêyî ke înan reyde bişewrê ameyo weçînayene û no heqê cuya înan tehdît keno. Dewijî seba pawitişê cuya xo xover danê û hewldayîşê înan ê huqûqî dewam kenê.
