Dewaya muxabirê ajansê ma Nedîm Oruçî taloqê 26ê êlule ameye kerdene.
Muxabirê ajansê ma Nedîm Oruç 14ê çeleyê 2026î de qezaya Cizîrî ya Şîrnexî de demo ke xebere taqîb kerdêne amebi girewtene û di 24ê nîsane de amebi veradayene. Roniştişo 2. ê dewaya Nedîm Oruçî Mehkemaya Cezayanê Giranan a Şirnexî ya 1. de bi tewrbîyayîşê rayberanê Komela Rojnamegeran a Dîcle Firatî (DFG) û avukatê Orûçî Huseyîn Sedat Sulgerî ame viraştene.
Dimayê tespîtê nasnameyan, avukat Huseyîn Sedat Sulgerî dîyar kerd ke muwekîlê ey rojnameger o û demo ke karê xo ser o bîyo, ameyo girewtene. Sewbîna Sedat Sulgerî waşt ke materyalê muxabirê ma Nedîm Orûçî bêrê dayene û qedexeyê vejîyyaîşê teberî yê Orûçî bêro hewanayene. Heyetê mehkema nê waştişê avukat Sedar Sulgerî red kerdî.
Muxabira Jinnewsî Neslîhan Kardaş û muxabirê Ajansê Mezopotamya (MA) Emrullah Acar roniştişî de sey şahid ameyî goşdarîkerdene. Rojnameger Neslîhan Kardaş dîyar kerd ke demo ke Nedîm Oruç ame destbendkerdene a zî uca de bîya û makîneya fotografan milê Nedîm Oruçî de bîya, sewbîna nasnameyê ey ê muxaburîye zî destê ey de bîyo.
Rojnameger Emrullah Acar zî vat ke rixmo ke Nedîm Oruçî nasnameyê xo yê muxabirîye mojna polîsan zî, polîsan ey destbend kerd.
Dimayê qiseykerdişan, heyetê mehkema dewa taloqê 26ê êlula 2026î kerd û waşt ke dozger mutalaya xo heta roniştişo bîn amade bikero.
