Sekreterê Pêroyî yê FLC CGIL’yî Do Concayî îfade kerd ke tesîrê vengdayîşê Rayberê Şarê Kurdî Abdullah Ocalanî bi herêmêk sînorkerde nîyo û vat: “Fesihkerdişê PKK’yî peynî nîyo, destpêkêk o. Ocalan û PKK sînoran derbaz kenê û çareserîya krîzê demokrasîyî kenê.”
Sekreterê Pêroyî yê Lombardiya yê Sendîkaya Karkeranê Perwerdeyî ya Îtalya (FLC CGIL) Massimiliano De Conca derheqê Vengdayîşê Aştî û Komelê Demokratîkî yê Rayberê Şarê Kurdî Abdullah Ocalanî û qewimîyayîşanê dimayê ci de ajansê ANF’yî rê qisey kerd.
De Conca îfade kerd ke feshkerdişê PKK’yî peynî nîyo destpêkêko newe yo û vat: “Krîter û qerarê Kongreya PKK’yî ya 12. îstîsnayî yê. Nê peynî nîyê, destpêk ê. Fikrê Abdullah Ocalanî bi xo wayîrê ê hezî yê ke eşkenê şeranê dinya biqedînê. Vengdayîşê Ocalanî nîşaneyê vurîyayîşêko pîlî yo. Şarê kurdî eşkeno bibo modelêkê polîtîkaya komelkî.”
De Conca îfade kerd ke seba serkewtişê prosesî mesuldarîyêka pîle kewena milê komelê mîyanneteweyî û vat: “PKK bi mesuldarîyêka pîle têgêraye. Ganî dewleta tirke qerar bida. Ya a do verê xo bida demokrasîyî yan zî rejîmê nikayênî biweçîna. Ganî komelo mîyanneteweyî zî hûrmetê krîteranê mîyanneteweyîyan bikero. Ganî dewleta tirke goreyê krîteranê mîyanneteweyîyan têbigêra. Eşkerayîyê PKK’yî yan zî ê Ocalanî seba vurîyayîşî qîm nêkenê. Ganî paştî bidîya prosesî. Seba serkewtişê prosesî ganî gamê sîyasî û huqûqî hetê dewleta tirke ra bierzîyê. Ewil ganî Abdullah Ocalan azad bibo.”
De Concayî bale ante girîngîya fikranê Rayber Apoyî ser û vat: “Heta ke sînorê sîyasî û neteweyî est bê şer zî do est bo. Tîya de fikrê Konfederalîzmê Demokratîkî yê Ocalanî girîng o. Ocalan girîngîye dano cinî û ciwanan ser zî. Nê fikrê Ocalanî -Konfederalîzmo demokratîk û komelê cinî û ciwanan- fikrê şorişgêrî yê.
Ganî cigêrayoxî fikrê Ocalanî ser o vinderê. Fikrê ey tena meseleya kurdan eleqedar nêkenê. Ewro meseleya bingeyîne meseleya demokrasîyî ya. Ganî çareserîya newîye bêra dîyene ke na çareserîye mîyanê fikranê Ocalanî de ya.”
