Partîya Herêman a Demokratîke (DBP), derheqê rojevê “heqê hêvî” de ke Komîteya Wezîran a Konseya Ewropa de ameye qiseykerdene, beyanatêko nuştekî da.
Beyanatî de ame vîrardene ke qerarê îhlalî yê AÎHM’î derheqê Rayberê Şarê Kurdî Abdullah Ocalan û hepsîyanê bînan de 11 serrî yo tatbîq nêbenê û ame waştene ke qerarî rew bêrê tatbîqkerdene.
DBP’yî vat: “Naskerdişê heqê hêvî tena îhlalê heqêko ferdî nîyo, eynî wextî de astengêko strukturel o ke prosesê çareserî qels keno.”
“Aktoro kilît ê ameyoxê demokratîkî”
Beyanatî de rolê Rayberê Şarê Kurdî Abdullah Ocalanî yê prosesanê çareserî yê verênan ame îşaretkerdene:
“Birêz Abdullah Ocalan, bi rolê xo yê prosesanê çareserîye yê verênan û perspektîfê xo yo ke ardo meydan, ameyoxê demokratîkî yê Tirkîya de aktorêko kilît o. Polîtîkaya bêtêkilîyeverdayîşo mutlaq vera ey yena ramitene, problemêko bingeyin o ke hêvîya çareserî û aştî ya heme şarî rê zerar dano. Muhîtê muzakereya demokratîke, bi wedarnayîşê nê îzolasyonan mumkun beno.”
Waştişî
DBP’yî beyanatî de nê vengdayîşî kerdî:
- Qerarê AÎHM’î û Komîteya Wezîran ya Konseya Ewropa ganî rew û bêkêmanî tatbîq bibê
- Rejîmê înfazê muebbetê pêtkerdeyî ganî tena ceza nêbo, sîstemêk bibo ke agêrayîşê komelî mumkun bikero
- ‘Heqê hêvî’ seba heme hepsîyan hetê huqûq, îdarî û fîîlî ganî bêro nasbîyayene û pawitene
- Bi taybetî Birêz Abdullah Ocalan û heme hepsîyan rê tatbîqatê tecrîdê mutleqî ganî rew bêrê wedarnayene
- Ganî nêro xovîrrakerdene ke ‘heqê hêvî’ tena pawitişê azadîye nîyo, heqê komelê Tirkîya yo ke aştî de biciwîyo û bi bawerîye ameyoxê demokratîkî ra biewnîyo. Naskerdişê nê heqî, hetê pêtkerdişê aştîya zereyî û seba reyna ronayîşê meşrûîyetê mîyanneteweyî gamêka tarîxî ya.
