Verfeka Dayîkanê Aştî ya Amedî Hevva Kiran eşkerayîya vîrameyîşê Sirri Sureyya Onderî de qisey kerd û dîyar kerd ke heta aştî bêra ca ê do xover bidê.
Endamê Heyetê Îmraliyî yê DEM Partî û Parlamenterê DEM Partî yê Stenbolî Sirri Sureyya Onder 15ê nîsane de Stenbol de krîzê qelbî vîyarna. 18 rojan ra pey nêweşxane de 3ê gulane de şi heqîya xo. Rêxistina DEM Partî û sazîyê komelkî û demokratîkî xeylê merkezan de eşkerayî dayê û tezîye ronayê. Dayîkê Aştîyî yê Amedî zî vernîya awanîya xo ya Yenîşehîre ya Amedî de eşkerayî daye çapemenî û Sirri Sureyya Onder ard xo vîr.
Verfeka Meclîsê Dayîkanê Aştîyî ya Amedî Havva Kiran qisey kerd û wina vat: “Sirri Sureyya Onder seba şarê kurdî xeylê bedêlê giranî dayê. Ma tu wext Sirri Sureyya Onder xo vîr ra nêkenê. Ma dejê heme kesî hîs kenê. Hevalê Sirri Sureyya Onder Seba aştî xover dayêne. Hezar reyî spas seba keda to. Demo ke aştî ame, ma do bêra mezela to ser û ma do vajê aştî ame, keda to veng nêşîye. Ma hêvî kenê ke aştî bêra nê welatî. Şarê kurdî do tu wext to xo vîr ra nêko. Cayê to cenet bo.”
