Cizîra Botan de bi hezaran welatî herikîyenê şîna şehîdanê Têgêrayîşê Azadîya Kurdîstanê ke ca û tarîxanê cîyayan de cuya xo ra bîyî.
Qezaya Cizîre ya Şirnexî de ewro bi pêşengîya Komeleya Yewî, Kultur, Piştîdayîş û Hetkarîyê ya bi Keyeyanê ke Dergûşê Medenîyetî de Merdimê xo Vîndî Kerdê (MEBYA-DER) ya Şirnexî, seba şehîdanê Têgêrayîşê Azadîya Kurdîstanê ke ca û tarîxanê cîyayan de cuya xo ra bîyî, verê banê DEM Partî de şîn ame ronayene.
Cayê şînî de posterê Rayberê Şarê Kurdî Abdullah Ocalanî, resmê şehîdanê Têgêrayîşê Azadîye, pankartê sey ‘Şehîdî Nêmirenê’, ‘Şehîdî roşnîya ma yê’, ‘Ma şehîdanê azadîye vîr anê’ û ‘Şehîdê ma rûmetê ma yê’ ameyî daliqnayene.
Botanijî bi sloganê ‘Şehîdî Nêmirenê’ herikîyenê cayê şînî
Keyeyanê cangorîyanê Azadîya Kurdîstanê semedê qebulkerdişê serweşiye, serê sibayî bi resmanê domananê xo cayê xo warê şînî de girewt û şarê Botanî zî qefle bi qefle verê xo dano cayê şînî. Bi hezaran welatîyanê ke bi resmanê cangorîyan verê xo da cayê şînî, sloganê ‘Şehîdî nêmirenê’ kerdî berz. Şîno ke saete 09.00 de dest pêkerd do heta saete 18.00 dewam bikero. Şîno ke seba şehîdanê Têgêrayîşê Azadîye ewro ameyo ronayene do 3 rojan dewam bikero û roja peyêne do seba şehîdan mewlid û merasîmê vîrardişî bêro viraştene.
