Kedkarê Çapemenîya Azade, rojnameger û şair Bayram Balci hetê keye, heskerdox, rojnameger û embazanê xo ra ame defin kerdene. Merasim de mesajê wayîrvejîyayîşê têkoşîn û kedê Bayram Balci ame dayene.
Seba Kedkarê Çapemenîya Azade, rojnameger û şair Bayram Balci (63) yo ke sebebê nêweşîya qanserî ra 23ê hezirane de Belçîka de cuya xo ra bîbî, Cemxaneyê Pîr Sultan Abdalî yê qezaya Batikentî ya Anqara de merasimê cenaza ame viraştene. Keye, heskerdoxî, rojnameger û embazê Bayram Balci zî merasîm de amade bî. Hetkarê Hemserekanê Pêroyî yê DEM Partî Ebrû Gunay, parlamenterê DEM Partî Heval Bozdag, endam û rayberê DFG, MKG, endam û temsîlkarê partîyanê sîyasîyan û sazgehê demokratîkan zî tewrê merasimî bîyî. Merasimê cenaza de bi rêzgirewtişê seba înanê ke rayîrê heqîqetî de dinyaya xo bedilnaya dest pê kerd.
Wayê Bayram Balciyî, Nuray Balci qisey kerd û wina vat: “Embazê min, şîîra min a ke hema nêqedîyaya, bi vatenê embazanê xo, ti raywanê heqîqetî yî. Waştişê ey aştî bî. Ma zî aştî wazenî. Şehîdî nêmerenê.”
‘Ma do wayirê mîrasê ey vejîyê’
Rojnameger Zana Kaya zî ard ziwan ke ê seba wefatê Bayram Balci zaf xemgîn ê û wina vat: “Sere de mamoste Huseyîn Aykol ra dima, ma mamosteyêko bîn ê xo zî vîndî kerd. Embazê Apê Musayî bî. 30 serran de yew keda pîle da Çapemenîya Azade. Mîrasê ey do têkoşînê ma de biciwîyo.”
Rojnameger Dîren Yurtsevere zî Bayram Balci vîr ard û vat: “Bayram Balci vîrê çapemenîya azade bî. Ma seba Bayram Balci û kesanê ke ma nê rayîrî de vîndî kerdê, soz danê ke ma do têkoşînê înan gird bikerî.”
Badê qiseykerdişan girseyî tabutê Bayram Balci girewt û ver bi goristanê Karşiyaka yê qezaya Yenîmahalle kewtî rayîr. Bayram Balci goristan de hetê keye, herkerdox, rojnameger û embazanê ey ra ame defin kerdene.
Şîîrê ey ameyî wendene
Defin kerdene ra dima beşdaran qeranfîlî ronayê serê mezelê ey. Embazanê Bayram Balci serê gorê ey de şîîrê ey ameyî wendene. Dima ra zî rojnamegerê ke tewrê merasimî bîbî, şîyî serê mezelê mamosteyê Çapemenîya Azade Huseyîn Aykolî zî zîyaret kerd ke eynî goristan de yo. Seba vîrardena Bayram Balci Komeleya Kulturî û ya Komelî dewa Dişlikî ya Tuzluçayirî ya qezaya Mamake de do loqme bêro vilakerdene.
