Rojnameger Omer Tur ke rojnamgeranê ke şahidê kiştişê Ugur Kaymaz û pîyê ey kerdbi, muhîmîya çapemenîya azade ya hedîseyanê winasînan de ard vîrî û vat: “Eke ma rastîya hedîseyê hovane yê kiştişê Ugur Kaymaz û pîyê ey nêvetêne orte û fotografê ci vila nêkerdêne, do no zî sey bi hezaran hedîse biameyêne nimitene.”
Ugur Kaymaz û pîyê ey Ahmet Kaymaz 21ê teşrîna peyêne ya 2004î de qezaya Qoserî ya Mardînî de vernîya keyeyê xo de hetê polîsan ra ameyê kiştene. Ugur Kaymaz 12 serre bi û 13 guleyan amebi kiştene. Bedenê ey guleyan ra bibi serad. Polîsan dima ke na hedîseya hovane kerde, çekê luledergî ronayê kîşta sereyê Ugur û pîyê ey. Medyaya terefgire hedîse eksê ci kerd û xeberanê zure, hedîse kerde milê PKK’yî. Her çend medyaya terefgir û walitîyê Mardînî yê ê wextî vatêne, “Di terorîstî ameyê kiştene” zî, Ajansê Xeberan ê Dîcleyî (DÎHA), rastîye vete orte û xeberê medyaya terefgir û eşkerayîya walîtî zure vete. Muxabirê DÎHA’yî yê Mardînî Omer Tur roja ke hedîse qewimîyaye, fotograf û vîdeoyê rasteqîn ê Ugur Kaymaz û pîyê ey Ahmet Kaymaz raya pêroyî reyde pare kerdê. Omer Tur bi xeber û vîdeoyanê ke vila keno, eşkere bi ke Ugur û pîyê xo sîvîl ê û bi hewayêko hovane ameyê kiştene.
Rojnameger Omer Tur bi munasebetê serrgêra kiştişê Ugur Kaymaz û pîyê ey a 21. qisey kerd û behsê a roje kerd.
Hedîse de rol û muhîmîya Çapemenîya Azade
Rojnameger Omer Tur behsê roja hedîseyê hovane kerd û vat: “Buroyê ma yê DÎHA’yî Qoser de bi. O wext hema zî tesîrê faîlanê nedîyarî dewam kerdêne. Kes zaf nêeşkayêne şêro cayanê hedîseyî. Ez û embazêkê mi, ma bilez û nimitkî xo resna cayê hedîse û nêweşxaneyî. Meyt nêweşxane de bi. Ma xo resna rayberanê ÎHD’yî. Înan zî nêzanayêne ê ke merdê kam ê. Ma hedîse ser o cigêrayîş kerd. Çapemenîya terefgire verê ke hedîse bêra zelalkerdene, goreyê eşkerayîya walîtîyê Mardînî xebere daye û bi sernuşte û manşetanê sey, ‘Di terorîstî ameyê kiştene’. Xebere daye. Ma eşnawit ke ê ke ameyê kiştene, înan ra ayew gede yo. Ma vat mumkin nîyo ke no kes ‘endamê PKK’yî’ bo. Avûkat û rayberê ÎHD’yî cayê karûbaranê otopsî de amade bîyê; vat ‘o gede 12 serre yo, nameyê ey Ugur Kaymaz o û bi 13 guleyan ameyo kiştene. O bîn zî pîyê ey Ahmet Kaymaz o. Ez bi lez û şefê xo yê ofîsî gêraya, mi vat ke a eşkerayîya ke ameya dayene, şaş û her di kesê ameyê kiştene zî sîvîl û welatijê Qoserî yê. Ma xebere amade kerde û bi sernameyê, ‘Qoser de 2 welatijî ameyê qetilkerdene’ xebere daye. Dima ke DÎHA’yî xebere vila kerde, temsîlkarê rojname û ajansan heme şaş mendê. O wext ma înan ra vat ke şima tena xebera xo b ivatişê walîtî virazenê, şima cigêrayîş nêkenê. Rixmo ke agahîyê rastî musayê û hedîse piştrast bîye zî reyna zî vatişê xo yê ‘2 terorîstî’ de îsrar kerd û xebere nêbedilnaye.”
‘Kamera û fotograf rastîye vejenê orte’
Omer Turî dîyar kerd ke dewamî de zî înan roşnîkerdişê hedîse ra fekveranêda û wina vat: “Her kesî fotografê hedîse û her di qurbanan gêrayêne. Ma hewl da ke xo biresnê keyeyî. Labelê polîsan keye û taxe girewtbî dorpêç. Ma hewl da xo biresnê fotografêkê Ugur Kaymazî. O fotografê Ugur Kaymazî ke cilê dibistane ey ra bîyê, ma zaf zehmet dî. Ma a roje heta nêmeyê şewe hewl da ke fotografî bivînê. Reya ewile fotografê Ugur û pîyê ye ajansê ma pare kerd. Fotograf û kameraya ma seba raya pêroyî ya kurd û Kurdîstanî xeylê manadar bi. Hezar hedîseyê ke wina qewimîyayê, seba ke fotografî çin bîyê, heme qurbanî ametê sucdarkerdene. Eke a kameraya ma nêbîyêne, ma fotograf vila nêkerdêne, do hedîseya Ugur Kaymaz û pîyê ey zî sey hedîseyanê bînan biameyêne nimitene û raya pêroyî do nêzanayêne gedeyêko 12 serre bi 13 gulleyan ameyo kiştene.”
