Şaredarîya Amedî ya Şaristanê Girdî seba 15ê Gulane Roşanê Ziwanê Kurdkî qezaya Sûrî de Cadeyê Gazî de kerrayanê peyarayîran ser o beyîtê şaîranê Edebîyatê Klasîkê Kurdkî nusnayî.
Serekîya Daîreya Karanê Kulturî û Sosyalî Mudirîya Şefîya Pawitiş û Averşîyayîşê Ziwanan, seba 15ê Gulane Roja Ziwanê Kurdkî xebatî dayî destpêkerdene û Cadeyê Gazî de kerrayanê peyarayîran ser o beyîtê şaîranê Edebîyatê Klasîkê Kurdkî nusnayî.
Cadeyê Gazî ke tewr kehen ê cadeyê bajarî yo, her 25 metreyan de yew, beyîtê şaîranê muhîman ê Edebîyatê Klasîkê Kurdkî sey Melayê Cizîrî, Feqiyê Teyran, Hacî Qadirê Koyî, Melayê Xasî û Siyapûşî kereyanê peyarayîran ser o nusîyayî û bêmerg bîyî.
Mudirê Şefîya Pawitiş û Averşîyayîşê Ziwanî Tahir Baykuşakî Roja Ziwanê Kurdkî pîroz kerd û wina qisey kerd: “Ma waşt ke Cadeyê Gazî ser o beyîtê şaîranê klasîkê kurdan kerrayan ser o binusê û nê cadeyî bixemilnê. Nika, nê cadeyî ser o 40 beytî do bêrê ronayene. Bitaybetî zî turistî ke nê herêmî ra vîyarenê, seba ke rengê Kurdkî bivînê, ma bi nê şeklî bala înan ant ziwanî ser.”
