Serokê Pêroyî yê MHP’yî Devlet Bahçelîyî derheqê prosesê Aştî û Komelê Demokratîk û statuyê Rayberê Şarê Kurdî Abdullah Ocalanî xerîteyêka nexşeyêka rayîrî ya ke 7 nuqtayan ra yena pê eşkera kerd û vat: “Seba ke awankerê rêxistine bieşko tesîrê xo yê serê rêxistine bîdomno, ganî mekanîzmayêk bêro awankerdene û statuyê Ocalanî bibo.”
Serekê Pêroyî yê MHP’yî Devlet Bahçelîyî, rojnameyê Turkgunî yo ke ê MHP’yî yo reyde derheqê prosesê Aştî û Komelê Demokratîk û statuyê Rayberê Şarê Kurdî Abdullah Ocalanî de xerîteyêka ke pare kerd ke 7 nuqtayan ra yena pê. Devlet Bahçelîyî derheqê nê prosesî de dîyar kerd ke seba ke Rayberê Şarê Kurdî Abdullah Ocalanî bieşko tesîrê xo yê serê rêxistine bîdomno, gere mekanîzmayêk bêro viraştene.
7 nuqtayê xerîtaya Devlet Bahçelîyî wina yê:
- Prosesê Tirkîya yo bêteror û averşîyayîş
- Merhelaya newîye û xerîtaya rayîrî
- Mekanîzmayê koordînatorî; çarçewa, rayraberdene û amancê ci
- Seba dewaya taqîbkerdişê prosesî, awankerdişî û nûsîyayîşê dezgehanê qanûn û îdareyî
- Tirkîyaya bêteror; raştî û waştişî
- Awankerdiş û herikîyayîşê Tirkîyaya bêteror de rewşa komelkî
- Netîce
‘Têkilîyan de kêmaneyî est ê’
Devlet Bahçelîyî bi nê 7 nuqtayan averşîyayîşê prosesê Aştî û Komelê Demokratîk û nêzdîbîyayîşê 27ê sibate yê Rayberê Şarê Kurdî Abdullah Ocalanî erjnayî û vat ke proses ameyo qonaxêka muhîme. Devlet Bahçelîyî dîyar kerd ke mîyanê dîyalog û têkilî de tayê kêmaneyî est ê û seba nê zî lazimtîya ci bi xerîtaya rayîrî ya newîye est a.
‘Ganî statuyêko minasîb ê Ocalanî bibo’
Devlet Bahçelîyî statuyê Rayberê Şarê Kurdî Abdullah Ocalanî de zî vat ke ganî statuyêko minasîb ê Rayberê Şarê Kurdî Abdullah Ocalanî bibo û wina dewam kerd: “Gere statuyêko minasîb ê Ocalanî bibo. Sîstemê ke yewbînan ra cîya yê, do prosesî zehmet bikerê û îhtîmalê provokasyonan pîl bikerê. Seba nê, ganî mekanîzmayêka newîye seba awankerê rêxistine bêro viraştene ke tesîrê ey ê serê rêxistine bidomno. Seba ma, mekanîzmayê prosesê aştî û koordînatorîya sîyasî do bibo statuyêko minasîb.”
