Şarê şaristanê Serêkanî yê Rojava ke vera hêrişanê dewleta Tirkîya mecbûr mendî warê xo biteriknê, dimayê hewt serranê giranan ê koçberî dest pêkerd ke agêrê serê erdê xo.
Karwano verên ke tede 410 keyeyî estê, bi amancê agêrayîşê keyeyanê xo şaristanê Hesekê ra kewtê rayîr. Yeno zanayene ke tîya ra hewt serrî ver, 9ê teşrîna verêne ya serra 2019î de vera hêrişanê dewleta Tirkîya û grûbanê girêdayeyê aye yê herême, bi deshezaran şênîyê Serêkanî û dewanê ci ra mecbûr mendî ke warê xo caverdê û koç bikerê. Nê keyeyî zafanê kampanê dormeyê Hesekê de sey kampê Waşokanî û kampê Serekanî û şaristanan de ca da bî xo, binê şertanê giranan de cuya xo vîyarna.
Agêrayîşê koçberan do qonax bi qoax dewam bikero
Badê hewt serran ê binê şertanê çetinan ê koçberîye û kampan de hazîrîyê agêrayîşê qedîyayê. Ewro Hesekê ra ver bi Serêkanî kewte rayîr. Yeno pawene ke agêrayîş do qonax bi qonax dewam bikero. Dima resayîş û cabîyayîşê grûba ewilîne, keyeyê binî yê koçberî zî aver de qonax bi qonax agêrê warê xo. Armancê sereke o yo ke şêniyê peyênî yê herême agêrê keyeyanê xo û cuya xo ya sivîle şaristanê Serêkanî de reyna bêro awakerdene.
Vejîyayîşê nê karwanî, koçberanê bînan ê Hesekê û herêmanê cîyayan de zî heyecanêko gird viraşt.
