Amed de bi rayberîya DEM Partî û DBP’î mîtîngê “Seba Aştîye, Azadîye” yeno viraştêne. Warê mîtîngî ra bi hezaran merdimê herikyenê. Verê mîtîngî, warê mîtîngî ra bi hezaran merdimê bêmîyan siloganan qirayê û pankartê “Jin, jiyan, azadî, dem dema serkeftinê ye” akerdê û meşîyayê. Dayikê Aştiyê zî bi laçikê xo yê sipî beşdar meşî bîyê.
Cinîyê zanîngehî pankartê “Heta Serok azad nebe, aştî şaşitî ye” akerdê, meşîyayê. Teberê şaristanî ra zî zaf hûmarî de merdimê seba mîtîngî ameyê, beşdarê mîtîngî bîyê, bi cil û bergê xoserî zî xo xemilnayê.
Posterê Rayberê PKK’î Abdullah Ocalan akerdê
Hewna warê mîtîngî de beşdaran bi coşî posterê Rayberê PKK’î Abdullah Ocalan û rojnamegerê ke hetê Dewleta Tirk de ameyê kiştiş akerdê.
Aktîvîsta TJA’yî Çaglar Demîrel mîtîng de qise kerd û va ke ê ser nameyê TJA’yî seba aştî, seyyewbînanî, waye û birayîya şaran mîtîng pê anenê û wina va: “Ma zanenê ke na aştî do bi têkoşîn û xoverdayişê Hereketa Cinîyê Azade pê bêra. Ewro aştî seba Rojhîlatê Mîyanênî û Kurdistanî sey awe û werd ferz o. Na girseya ke war dekerda heme aştî û demokrasî wazenê. Muxatab dîyar o, ma seba Rayberê Şarê Kurd Abdullah Ocalan azad bibo, têkoşîn danê.”
Çaglar Demîrel wina domna: “Ma her dem her ca de seba aştîye têkoşîn danê, wa her kes bivînê ke no war de cinîyê kurd aştî û azadîye wazenê. Eke aştî aver şîra, do tecrîd bi peynî bibo. Wa verê her çikî tecrîdê ser Rayberê Şarê Kurd Abdullah Ocalan hawanê û bieşkero ke mîyanê muzakerayan de ca bigo û azadî nêzd a. Azadîya Rayberê Apo nêzd a.”
Mîtîngê Amedî de Hemsereka DBP’î Çîgdem Kiliçgun Uçar va ke: “Xizir, pêrodayişê sarê kurdan, cinîyê kurdan û xoverdayişê xortê kurdan bivîno, pêrodayişê ma bisevekno. Îyê ke roza xizir de, loqma danê; Îyê ke dua kenê, ma ra gulbang bo û azadîye bîyaro.”
Na asme ma rê mujdeyan bîyara
Mîtîng de Hemsereka DBP’î Çîgdem Kiliçgun Uçar bi zazakî qise kerd û wina va: “Ma xêr dî, sarê ma yê delal. Ma xêr dî sarê ma yê qedîrberzî, sima xêr ameyê û ser çimanê mi û ser serê mi ameyê. Asma usar derîme, wazenîme ke na asme ma rê mujdeyan bîyara. Mujdana azadî, mujdana haştî bîyara. Asma xizir derîme; xizir ma bivîno. Pêrodayişê sarê kurdan, pêrodayişê cinîyê kurdan, pêrodayiş û xoverdayişê xortê kurdan bivîno, pêrodayişê ma bisevekno. Îyê ke roza xizir de, loqma danê; Îyê ke dua kenê, ma ra gulbang bo û azadîye bîyaro.”
Wa canê ma feda bibo
Dayîka Aştîye Havva Raiba Kiran zî mîtîng de dîyar kerd ke şarê kurd aştî û birayîye wazeno û wina domna: “Şarê kurd her tim aştî û azadî waşto, wa her kes wardo û aştî biwazo. Ma mergê çewî nêwazenê, ha lejker bibo, ha gerîla bibo. Rengê hesê çimanî yê dayîkan eynî yo. Ma bi serranê ke dayîkê lejkeran rê zî veng danê, bêrê ma pîya aştî û xuzirî bîyarê. Ma aştî û yewîye wazenê.”
