MED TUHAD-FED û TUAY-DER’î derheqê binpaykerdişê heqanê girewteyanê cinîyan vernîya Edlîyeya Amedî eşkerayî daye. Parlamenter Newroz Uysal Aslan dîyar kerd ke azadîya cinîyanê girewteyan bi destê komîteyan yena astengkerdene û vat: “Heta ke heme girewteyî bêrê veradayene têkoşînê ma do dewam bikero.”
Federasyonê Komela Huqûq û Piştgirîye ya Keyeyanê Girewte û Hukumwerdoxan a Medî (MED TUHAD-Fed) û Komela Piştîdayîşî ya bi Keyeyanê Girewte û Hukumwerdoxan reyde (TUAY-DER) seba binpaykerdişanê heqanê girewteyanê cinî vernîya Edlîyeya Amedî eşkerayî daye. Rayberê MED TUHAD-FED, TUAY-DER, temsîlkarê rêxistinanê sîvîl, Dayîkê Aştî, Hemserekê DEM Partî û DBP’yî yê Amedî, Parlamenterê DEM Partî yê Amedî Mehmet Kamaç û Parlamentera DEM Partî ya Şirnexî Newroz Uysal Aslan û xeylê kesî beşdarê eşkerayî bîyê.
Çalakî de fotografê cinîyanê ke ameyê girewtene. Polîsan nêverda ke fotografê. Sakîne Cansiz bêro girewtene. Sewbîna pankartê “Azadîya Cinîyan, Awankerdişê Komelê Demokratîkî ya” ame akerdene. Eşkerayî bi slogananê “Jin Jîyan Azadî û Bijî Berxwedanê Zindanan” dest pêkerd.
Eşkerayî hetê Hemsereka TUAY-DER’î ya Amedî Yeter Erel Tuma ra ameye wendene. Balkêş bi ke eşkerayî tena bi tirkî ameyê wendene, kurmancî û zazakî çin bîye!
‘Ganî zilmê girewteyan ser o biqedîyo’
Eşkerayî ra pey Parlamentera DEM Partî ya Şirnexî Newroz Uysal Aslan dîyar kerd ke hepisxanaeyan de îşkence dewam keno û vat: “Girewteyanê nêweşan ser o astengî est ê, girewteyê nêweşî nêyenê dermankerdene. Senî ke teber de yeno waştene ke îradeyê şarî bêro çinkerdene, eynê wextî de yeno waştene ke hepisxaneyan de zî îradeyê embazanê ma yê girewteyan bêro şiknayene. Zilmo ke şarî ser o yeno kerdene, nîşaneyê zilmê girewteyan ser o yo. La girewteyê cinî sere nêtewnenê. Çaresernêkerdişê meseleyê kurdî hepisxaneyan ser o tesîr keno. Azadîya cinîyanê girewteyan, bi destê komîteyan yena astengkerdene. Ganî zilmo girewteyan ser o biqedîyo. Heta ke heme girewteyî bêrê veradayene, do têkoşînê ma dewam bikero.”
