Ankara – Verfeka DEM Partî Ayşegul Dogane da zanayene ke dergbîyayîşê wextî prosesî ser o tesîr keno û vat: “Gelo destêko ke ma nêvînenê mîyanê prosesî de yo û asteng keno?”
Dogane merkezê pêroyî yê partî de derheqê averşîyayîşanê rojeve de eşkerayîyêk daye. Dogane vat ke înan nê hewteyî de Partîya Newe zîyaret kerd û do zîyaretanê xo yê partîyanê sîyasîyan dewam bikerê. Dogane bale ante dizdîya fonan ser o û vat: “Ma vera problemêkê kronîkî rî bi rî yê. Eke îqtîdar wazeno ma bi tehqîqatan bawer bikerê ganî verê her çîyî rojnamegerê ke nê dizdîyan nusenê ceza nêgîrê.”
Dogane da zanayene ke înan seba bûdçeya serra 2027î kampanyaya “Seba nan, aştî û edaletî bûdçe” daye destpêkerdene. Goreyê Dogane hemserekê pêroyî zî do beşdarê kampanya bibê û zaf cayan ra pêvînayîş, çalakî û mîtîngî do bêrê organîzekerdene. Kampanya do kanûne de Ankara de biqedîya.
Dogane ard vîrî ke prosesî 2 serrî verê cû bi vengdayîşê Birêz Bahçelîyî dest pêkerd û vat: “Badê qanûnê çarçewa Îdareyê Têgêrayîşî da zanayene ke heme cayanê ke xeterîya pêkewtişan tede bî, tira ancîyayo. Ganî heta nika berê Îmrali biabîyêne şert û mercê Birêz Ocalanî nêameyî rindkerdene. Heyetê Aştî û Sîyasetî do key dest bi xebatan bikero? Dergbîyayîşê wextî prosesî ser o tesîr keno. Ê çi pawenê?”
Dogane bale ante binpaykerdişanê heqan ê hepisxaneyan ser o û vat: “Goreyê doneyanê OHD’yî 3 aşman de verdayîşê 90 hepsîyan ame astengkerdene. Hepsîyê nêweşî nêyenê verdayene. Ma venga Wezîrê Edaletî danê: Gamanê şênberan bierzê. Gamê şênberî qedînayîşê nê pratîkan ê.” Dogane sewbîna vat ke ê do piştî bidê çalakîya rojnamegeran a roja şemeyî.
