Ferfeka DEM Partî Ayşegul Dogane, Meclîs de awankerdişê komîsyonî ser o qisey kerd û va: “Vatişê çîkanê neweyan bes nîyo. Ganî çîkanê newe bêrê kerdêne.”
Ayşegul Dogan, merkezê partîya xo de kombîyayîşê çapemenîye viraşt. Ayşegul Dogane vengdayîşê Rayverê Şarê Kurdî Abdullah Ocalanê, qerarê PKK’yî û pêvînayîşê peynîye ercna û va: “Rewşa ke ma ewro ma mîyanê ci de yê, seba pêvajo nîşan dano ke rîtmê xo ser o şona. Rewşa ke xetimyayo çin o, yanî krîz zî çin o.”
Ayşegul Dogan, bal ant ser meseleyanê ke xetîmyayîşê înan zêde kenê, serûbûtanê Rojhelatê Mîyanênî yê ke Rayverê Şarê Kurdî Abdullah Ocalan ercnayîşanê xo de nîşan dabi û wina domna “Nê meseleya kurdan, nê zî mesela demokrasî ya Tirkîya de, meselayanê Rojhelatê Mîyanênî ra cîya nêeşkenê bêrê ercnayîşî. Ma nika qiseyê yew mesela herêmî kenê; meseleya herêmî eşkenê tesîranê serûbûtanê herêmî bikerê. Nêzdîbîyayena ma ya Rojhelatê Mîyanênî û nêzdîbîyayena ma ya meselayanê Tirkîya de eynî ya. Ma bawer kenê ke meseleyanê Rojhelatê Mîyanênî zî ganî bi rayîrê dîyalog û dayîşûgirewtişê sîyasî bêrê çareserkerdêne. Ma vera her tewirê polîtîkayanê ewleyî-pawitişî û nêzdîyayîşê hegemonîkî de yê. Mîyanê na rewşe de zehmet o ke merdim texmîn kero ke şer kam ca reseno. Ganî warê sîyasetê demokratîkî lezûbez bêro xurtkerdêne, lezûbez averşîyayîşê demokratîkî bêro dayêne. Her çîk, Rojhelatê Mîyanênî de bedilyeno û pêro dewletanê ke Rojhelatê Mîyanênî de yê, parçeyê xo no bedilyayîşî ra gêno. Waştiş û hêvîya ma a ya ke no bedilyayîş bi hawayêkê demokratîk û aştîyane bibo.”
Ayşegul Dogan destnîşan kerd ke ganî Serekê Meclîsî bi înîsîyatîfê xo hereke bikero û wina qedîna “Bi no înîsîyatîfî eşkeno rayedarê partîyan, hemserekan, serokê pêroyî ya zî rayedarê selahîtdaran ê partîyan pê bîyaro, derheqê usûl û esasê komîsyonî de tay pêvînayîşan bikero. No zî eşkeno bi ray a pêroyî rê vila biko. Bêguman ma eşkerakerdişê peynîyî û nêzdîbîyayîşê Numan Kurtulmuşî yê derheqê komîsyonî de erênî vînenê. Ma dima kombîyayîşê Desteya Îdareyê Merkezî eşkerakerdiş da, ganî ma qiseykerdiş ra zêdeyêr bikerê. Eya, avzelîya ma bi eşkerakerdişê bi nîyetê holî û erênî est o. Labelê vatişê çikanê neweyî bes nîyo. Ganî merdim çîkanê neweyî bikero. Çîke avzelîya komelî bi pratîka gorê qiseykerdişî est a.”
