Amedspor o ke raya verêne vejîyeno Lîgê Superî, do ewro maçê xo yê verêne Erziromsporî reyde kaybikero. Teberê bi des hezaran merdimanê ke do stad de maçî seyr bikerê, bi mîlyonan heskerdoxê Amedsporî zî do maçê televîzyon de temaşe bikerê.
Amedspor o ke raya verêna ke vejîyayo Lîgê Superî yê Trendyolî, do ewro saete 21:30 de maçê xo yê verêne Stadyûmê Tahîr Elçî yê Amedî de Erziromsporî reyde kaybikero. Amedspor o ke hazirîyê xo temam kerda, do seba serkewtişî vejîyo na maçê. Hetgiranê Amedsporî ke bi heyecanêko gird na maçê pawenê, teberê bi des hezaran hetgiranê ke do stad de maçî seyrbikerê, bi mîlyonan heskerdoxê Amedsporî zî do maçî televîzyon ra seyrbikerê. Hetê bînî ra, heme grubê hetgiranê Amedsporî ke bînê yew serbanî de bîyî yew, do no maçî de tribunê peyê kelaya hetê başûrî de cayê xo bigîrê û pêroyî maçî de paştîdayîşê taximê xo bikerê. Berpirsîyarê grubanê hetgiran veng da ke her kes vera provokasyonan hesas bo.
Hetê bînî ra, Wezîrê Karê Zereyî Mûstafa Çîftçî, Wezîrê Spor û Ciwanan Osman Aşkin Bak, Serekê Federasyonê Futbolî yê Tirkîya Îbrahîm Haciosmanoglû zî tede, zaf rayedarê dewlete, parlamenterî, hemserekê şaredarîyan, sîyasetmedarî û endam û rayberê dezgehanê sîvîlan zî do stad de maçî seyr bikerê. Wezîrê Karê Zereyî Mûstafa Çîftçî çend rojî verê cû derheqê maçê Amedspor û Erziromsporî de qisey kerdbî. Mûstafa Çîftçîyo ke bal ant prosesê “Aştî û Komelê Demokratîkî” ser ke Rayberê Şarê Kurdî Abdullah Ocalanî dabi destpêkerdene, dîyar kerd ke ê pawenê ke na maçê nê prosesî rê xizmet bikero. Amedspor o ke 16 transferê neweyî kerdî û kadroyê xo bihêz kerd, wazeno maçê xo yê verên de vernîya hetgiranê xo de Erziromsporî binfîno û serkewtişêko muhîm bikewo dest. Sewbîna Amedspor hedef keno ke lîg de serkewtişêko baş bigîro û tewrê kupayanê Ewropa bibo.
