Welatijê Amedî derheqê mesajê Rayberê Şarê Kurdî Abdullah Ocalanî yo bi vîdeo de dîyar kerd ke şarê kurdî heme çî kerd û ganî tîya ra pey dewlete gaman bierza.
Rayberê Şarê Kurdî Abdullah Ocalan 27ê sibate de vengdayîşê “Aştî û Komelê Demokratîkî” kerd. Vengdayîşî ra pey Partîya Karkeranê Kurdîstanî (PKK) 12ê gulane de encamnameyê kongreya xo eşkera kerd û dîyar kerd ke xo fesih kena. Ewro zî vengdayîşo tarîxî yo newe û tarîxî yê Rayberê Şarê Kurdî Abdullah Ocalan bi rayîrê Ajansê Xeberan ê Firatî (ANF) ame parekerdene. Rayberê Şarê Kurdî Abdullah Ocalan dîyar keno ke proses resayo astêka newa û vengdayîşê çekronayîşî gerîlayan rê kerd. Welatijê Amedî mesajê Rayberê Şarê Kurdî Abdullah Ocalanî ajansê ma rê erjna.
‘Aştî yew hetî reyde nêbena’
Welatija bi nameyê Zekerîya Tanriverdî dîyar kerd ke ê aştî keyfweş benê û vat: “Yê ma game erzenê la hetê bînî hema zî tu game nêeşta. Seba girewteyanê sîyasî ganî efû bêro vetene. Gamî bêrê eştene xora problemî orte de nêmanenê. Ganî dewlete gaman bierza, aştî yew hetî reyde nêbena. Ganî Serok azad bibo, bê serokî aştî nêbena.”
‘Aştî bêra do heme çî baş bibo’
Welatija bi nameyê Ulfer Kalkan dîyar kerd ke înan her dem aştî waşta û wina qisey kerd: “Ma nêwazenê ciwanî bêrê kiştene. Ma şer nêwazenê. Gerîla zî leşkerî zî wa nêrê kiştene. Aştî bêra do heme çî baş bibo. Ma heta ewro heme çî dî, keyeyê ma ameyê veşnayene, ciwanî ameyê kiştene û peyê panzeran ra ameyê antene. Êdî ma nê çîyan nêwazenê.”
‘Ganî dewlete zî gaman bierza’
Welatijo bi nameyê Seyfettîn Sizlanan zî dîyar kerd ke aştî biba do xeylê baş bibo û keyfweş bibê û wina vat: “Eke aştî bêra do başbîyayîş zî bibo. Do xerabîyayîş zî orte ra wedarîyo. Ganî her kes nê barî bigîro milanê xo ser o. Seba ke aştî biba ganî dewlete zî gaman bierza.”
‘Bawerîya ma bi dewlete çin a la bi Abdullah Ocalanî est a’
Welatijo bi nameyê Îlhamî Mutlu îfade kerd ke ganî her kes aştî biwazo û wina qisey kerd: “Seba aştî biba gama sereke veradayîşê girewteyanê nêweşan a. Ewro kesê ke 30 serrî ra vêşêr o zere de yê, est ê. Behsê aştî yena kerdene la hema zî girewteyê. Bawerîya ma bi dewletre çin a la bawerîya ma bi Abdullah Ocalanî est a. PKK’yî xo fesih kerd la ewro bi hezaran kesî hepisxane de yê. Xeylê kesî hema zî yenê girewtene. Ganî qanûnî bêrê bedilnayene.”
