Rayedaranê Talîbanî eşkera kerd ke hetanî nika Heratê de zêdeyî 19 cinî seba ke ‘qaydeyê hîcabê ca nêardê’ ameyê destbendkerdene û no caardene do dewam bikero. La goreyê raporê Neteweyê Yewbîyayeyê zî 30 cinî ameyê destbendkerdene.
Afganîstan de cinî, bi maneya ‘qaydeyê hîcabî ca nêardê’ hetê hêzanê Talîbanî ra yenê destbendkerdene û rastê teda yenê. Serekê Emnîyetê Daîreyê Polîsan ê Heratê yê Talîbanî, Necîbullah Alî eşkera kerd ke hetanî nika zêdeyî 19 cinî hetê polîsanê ehleqî ê Talîbanî ra bi maneya ke qaydeyê hicabî ca nêardê, ameyê destbendkerdene.
Necîbullah Alî îfade kerd ke kontrolê kincan ser o dewam kene û kesê ke goreyê qaydeyanê hîcabî tênêgêrenê do bêrê çareserkerdiş. Goreyê eşkerayîye ey, no caardene Heratê de dewam keno.
Berpirsê ewleyîye xo mikur ard
Berpirsê ewleyîya Talîbanî ê Heratê qebûl kerd ke seba çalakîkeranê vera girewtişê cinîyan ê herêmê Cebraîlê guleyê hîşyarîye ameyê eştiş û tayê kesî ameyê destbenderdene.
Eşkerayîya ke ameya dayene de Heratê de xeberê girewtişê cinî û kênayan rîyê kincan înan zêde bîyî. Eynî demî de, yewîneyê cinîyan ê Neteweyê Yewbîyayeyî eşkera kerd ke goreyê doneyanê înan 30 cinî hetê Talîbanî ra ameyê destbendkerdene.
2 kesî cuya xo ra bîyî înan ra yew gedeyo
Goreyê raporê, rayedaranê Heratê tewr tayê 30 cinî vera qaydeyê hîcabî ê Talîbanî binpay kerdê ameyê destbendkerdene. Grûbêke cinî ke amebî destbenedkerdene dima ra ameyê veredayîş.
Raporê NY’yî yo xoser de ame dîyarkeredene ke hêzê ewleyîyê ê Talîbanî guleyî mêrde, cinî û gedeyê ke beşdarê çalakîye bîyî ser o varnayê û înan derb kerdê.Demê mudaxaleyî de gedeyêk zî tede tewr tayê 2 kesî cuya xo ra bîyî, zêdeyê 20 kesî zî birîndar bîyî.
Rexnegêran îfade kerd ke sînordarkerdişê reaksîyonanê vera protesto û domdarîya bêvengîye, Afganîstanî de rayîr verê caardişanê çetîn ê teda û qedexeyê vera cinîyan akenê.
