95 rêxistinanê sîvîl û mîyanneteweyî Cenevre de qanûnê cezayî yo newe yê Talîbanî şermezar kerd ke tedaya hemverê cinîyan û gedeyan rewa kenê.
Talîbanî qanûnê cezayî yo newe qebul kerdo ke destûr dano camêrdan ke hemverê embaz (cinî) û gedeyanê xo teda bikerê. No qanûn tedaya mîyanê keyeyî qanûnî keno û herinda “suc” de sey “babeta teqdîrî” kategorîze keno.
‘No qanûn tedaya vera cinî û gedeyan rewa keno’
Roniştişê Meclîsê Heqanê Merdiman ê Neteweyanê Yewbîyayeyan ê Cenevreyî de 82 rêxistinê komelê medenî yê Efxanîstanî û 13 rêxistinê mîyanneteweyî eşkerayîyêka hempar pare kerde û komelê mîyanneteweyî ra waşt ke nê qanûnî şermezar bikero.
Eşkeraye de ame vatene ke no qanûn wextêk de ame qebulkerdene ke cinî û gedeyê kênekî heqê wendiş, tayînbîyayîş, azadîya ameyîş û şîyayîşî û beşdarîya komelkî ra bêpar mendê û her nerazîbîyayîş yeno tefisnayene.
Qanûna cezadayîşê Talîbanî hîrê beş, 10 bend û 119 madeyan ra yeno pê. Badê ke hetê serekê payeberz ê Talîbanî Heybetullah Axundzade ra ame îmzakerdene mehkemayanê şaristanan û sazgehanê edaletî rê ame pêşkêşkerdene. No qanûn tedaya hemverê cinîyan û gedeyan sey suc nêvîneno û rayîrê kolekerdişî akeno.
