4 cinîyê ke seba tacîz, tehdît, heqaretî û şertanê xirab yê karî ra bi fesihê heqdar peymanê xo yê karî qedênayî, têkoşînê xo domnenê û mesajê WhatsAppî yê derheqê şîkayetê tacîz û tehdîtî CIMER’î rê ameyê kerdene, vejîyayî orte.
4 cinîyê karkerî yê ke depoyanê HepsîJET’î yê qezaya Esenyurtî ya Stanbolî de xebitîyayêne, seba ke tazminatê xo bigîrê 16ê sibate de dest bi çalakîya çadirî kerd. Cinîyan ke 27ê çele de seba tacîz, heqaret, tehdît, mobîng û şertanê xiraban yê karî ra bi fesihê heqdar peymanê xo yê karî qedênayo, tazminatê înan yê qidemî û îxbarî nêameyê dayene. Vera naye Vîyan Çakir, Esra Yilmaz, Meryem Arslan û Meryem Yilmaz verê depoyan de dest bi çalakî kerd û bi qerardarî çalakîya xo domnenê.
Şîkayetê heqaret û tacîzî yo CIMER’î rê
Cinîya ke şîkayetê xo CIMER’î rê nuşto û dîyar kerdo ke Fîrmaya Lojîstîk a Depoya Esenyurtî ya HepsîJETî de xebitîyena, îdia kerdo ke karkero bi nameyê K.K. heqaretê fekî û tacîzê cinsî kerdo cinîyan. Şîkayet de wina dewam kerdo: “Ez hetê keso bi nameyê K.K. ra bi heqaretê fekî û tacîzî demêko derg o ke yena tehdakerdiş. Mi mesele berd muxatanabê corênan zî la mi cewabêko weş nêgirewt. Ez hêvî kena ke şima rayberî do nê meseleyî de mi rê ardim bikerêd. Ez bawerîya xo ana hîsdarîya şima ya derheqê tacîzê cinîyan ê cayê karî de û wazena vengê xo biresna edaletê şima.”
Mesajê tehdîtî yê tacîzkerî
Mesajê WhatsAppî cinîya karker a bîne ke K.K. ra tehdît girewtbî badê ke tacîzî şîkayetê îdareyî kerdbi, vejîyayî orte. K.K. mesajê de ke cinîya karkerî rê erşawito, perseno ke aye îdarekaro bi nameyê “Kazim”î rê şîkayet kerdo yan nê.
