Li navçeya Geverê ya Colemêrgê bi pêşengiya Platforma Saziyên Demokratîk ji bo girtiyên nexweş û jinên girtî daxuyanî hat dayîn û di daxuyaniyê de hat xwestin ku sepanên di girtîgehan de bi lez û bez bên sekinandin û girtiyên siyasî bên berdan.
Li navçeya Geverê ya Colemêrgê bi pêşengiya Platforma Saziyên Demokratîk a Colemêrgê ji bo girtiyên nexweş û tundî û zordestiya li ser jinên girtî pêk tê li ber Edliyeya Geverê daxuyaniyek hat dayîn. Dayîkên Aştiyê, Parlementerên DEM Partiyê yên Colemêrgê Oznur Bartin û Onur Duşunmez, hevşaredarên Geverê û nûnerên saziyên sivîl tev li daxuyaniyê bûn.
‘Tundiya li ser girtiyên nexweş û jinên girtî berdewam dike’
Daxuyanî ji aliyê HevserokaTUHAY-DERê ya Colemêrgê Pinar Yilmaz ve hate xwendin. Pinar Yilmaz ragihand ku rewşa girtiyên nexweş yên jin xerab dibe û divê jin bi hebûn û nasnameya xwe tev li pêvajoya Aştî û Civaka Demokratîk bibin. Pinar Yilmaz diyar kir ku divê tundiya li ser jinê bê sekinandin, jin bi awayek azad di nav civakê de cîh bigirin.
‘Heta Serokatî û hevalên siyasî neyên berdan têkoşîna me wê berdewam bike’
Piştî daxuyaniyê Parlamenterê DEM Partiyê yê Colemêrgê Onur Duşunmez xwest ku azadiya fîzîkî ya Rêberê Gelê Kurd Abdullah Ocalan pêk bê û hemû girtiyên siyasî bên berdan. Onur Duşunmez bal kişand ser rewşa girtiyên siyasî ku Lijneya Çavdêriyê bi biryarên siyasî tevdigere û got: “Di vê pêvajoyê de di zindanan de cenazeyên rêhevalên me derdikevin. Em vê bê edaletiyê qebûl nakin. Berpisyarê vê Wezareta Dadê û Adliye ne. Me bi dehan caran bangawazî kir ku rewşa hevalê me Tuncer Saglam nebaş e. Bi salan e berdana hevalan bi destê Lijneya Çavdêriyê tê taloq kirin. Nedîme Aklav, Semrîn Demîrbag cezayên wan 7-8 carin tên taloq kirin. Em li vir dibêjin; heta Serokatî û hevalên me azad dibin em ê têkoşîna xwe berdewam bikin.”
‘Lijneya Çavdêriyê biryarên siyasî dide’
Parlamentera Colemêrgê Oznur Bartin jî bal kişand ser rewşa girtiyên nexweş ku dewlet bi zanebûn mirinê dide ber wan û wiha got: “1412 girtiyên nexweş hene, 161 ji wan jin in û 330 girtî jî nexweşên giran in. Di vê sala 2026an de 4 jinên girtî xwe di zindanan de kuştin. Divê girtiyên siyasî bi lez û bez bigihijin azadiya xwe. Lîjneya Çavdêriyê ji hevalên me yên ku cezayê xwe xelas kirî re dipirse ‘Hûn poşman in?’ Bi awayek siyasî û bîrdozî nêzik dibe. Ev tişt nayê qebûl kirin. Hevalên jin derman nastînin, nabin nexweşxaneyan û dixwazin vîna wan tepeser bikin. Têkoşîna jinan a li hemberê vê qirêjiyê vê berdewam bike.”
Daxuyanî bi çepikan bi dawî bû.
