Êlih – Şukru Acar ê ku 15 sal in kurê wî tev li nava Tevgera Azadiyê bûye diyar kir ku çend salan emniyeta Êlihê li wan digeriya û niha jî cendirme li wan digere û wan aciz dike.
Di 9-10 salên dawî de dewlet Tirk gelek caran bi polîtîkayên şerên taybet li Kurdistanê malbatên ku zarokên wan tev li nava Tevgera Azadiya Kurdistanê bûne, wan bi zarokên wan tehdît dike. Gelek caran ji malbatan re dibêjin, wêneyên zarokên xwe bînin li ber deriyên Partiya Demokratîka Gelan (HDP) nobetê bigirin. Her wiha gelek kes li gel ku zarokên wan ne di nava Tevgera Azadiyê de bin jî dîsa diçin li wir nobetê digirin. Gelek malbat jî di encama qanihkirina ku dê meaş û pere bidin wan, ji aliyê polîsan ve birin ber deriyên HDPê.
Herî dawî jî emniyeta Êlihê li Şukru Acar ê ku beriya 15 salan kurê wî tev li nava Tevgera Azadiyê bûye, geriyaye. Şukru Acar diyar kir ku emniyetê gelek caran bi anîna kurê gef li wan xwarin e û teklîfa pere û gelek tiştên cuda lê kirin e. Şukru Acar got ku emniyet sekinî ye niha jî cendirme lê digerin.
Ewilî emniyet bû niha jî leşkerî lê digere
Şukru Acar diyar kir ku emniyet ev çend sal in li wan digere û wan aciz dikin û got: “Her meh li me digerin û em diçin emniyetê. Li wir gelek caran ji me re digotin ka kurê we li ku ye? Di demên dawî de emniyetê bela xwe ji me vekir. Niha jî leşker digerin û bela xwe li me didin. Du caran geriyan ji min re gotin, ger ku tu li malê bî em ê werin. Min jî got ez li mal im. Piştre dîsa bû çend car dibêjin, kurê te li ku ye, xebera te jê tune ye? Ji min re digotin, em bi alîkariya hev wî bînin. Ji roja ku çûye heta îro me tu agahî jê negirtiye, em nizanin li ku ye. Îro car din jî li min geriyan û gotin, tu me nas dikî te telefona me qeyd kiriye? Min jî got çi we nas dikim. Gotin ka te xeberekî ji kurê xwe negirtiye? Dema li min digerin ez pirr aciz dibim.”
‘Em ê bi ya wan nekin’
Şukru Acar bal kişand ser teklîfên emniyetê ku li wan kiriye û wiha axivî: “Ji min re gotin ‘biçin ber derê HDPê rûnên em ê mehê 10 hezar lîre pere û alîkariya zexîre bidin we’. Ji min re gotin tişteke pir baş e. Min jî ji wan re got hûn serê min jî jêkin ez naçim. Min ji wan re got, hûn ne Êlih ne Tirkiyeyê, hûn hemû dinyayê li ser min tapû bikin, ez gazî kurê xwe nakim. Me xwe dîtiye nedîtiye em girêdayê partiyê ne. Dema ku ez tiştekî wisa bikim ez ê çawa li ber hevalên xwe serê xwe serê xwe bilind bikim. Ez dibêjim bila êdî li me negerin. Ew hezar carî jî gazî bikin em ê bi ya wan nekin.”
