Birayê Rayberê Şarê Kurdî Abdullah Ocalanî, Mehmet Ocalanî dîyar kerd ke kombîyayîşê peynî de Abdullah Ocalan ziwanê dayîke ser o vindert o û wina vato: “Êdî estbîyayîşê kurdan garantî bîyo û nîka ra pey Kurdîstan de heme sazgehê demokratîkî ganî her çî û xebatanê xo bi kurdkî bikerê.”
Mehmed Ocalanî qalê kombîyayîşê peyênî kerd û vat ke Abdullah Ocalanî derheqê muhîmîya ziwanê dayîke de qiseykerdişêko derg kerdo û wina vat: “Serekî kombîyayîşî de îfade kerd ke têkoşînê 50 serran estbîyayîşê kurdan da qebulkerdene û vat ke ‘nika eya Kurdîstan de heme sazgehê demokratîkî ganî her çîyê înan, her xebatê înan bi Kurdkî bo.’ La çi heyf o ke sazgehê ma hema nê zîhnîyetî de nîyê. Sazgehê ma, partîyê ma yê sîyasî Kurdkî qisey nêkenê. Eşkerayîyan de bi çend çekuyan silamanê xo bi Kurdkî danê û dima tirkî qisey kenê. Çi heyf o ke bi nê hewayî sazgehê ma yê demokratîkî nêeşkenê ma azad bikerê.”
Mehmed Ocalanî vat ke Abdullah Ocalanî kombîyayîşî de vato ke ganî kurdî her warê cuye de bi Kurdkî biciwîyê û wina domna: “No telîmatê Serekî yo. Serek vano ‘her ca de, mîyanê keye de, kombîyayîşan de û heme waranê cuye de ganî cuya şima bi kurdkî ba.’ Ma hemverê asîmîlasyonî dewlete reyde têkoşîn kenê la warê ziwanî de ma zî cayê dewlete girewto. Eke Kurdkî nêzano ganî Kurdîstanî de parlamenterîye nêkero. Se heqê to est o ke ti kurdan asîmîle bikerê?”
Mehmet Ocalanî vat ke Serekî eynî wext de vato: “Teqez ma qebul nêkenê, eke kesêk kurd bo û kurdkî nêzano bi hewayêko wijdanî ganî pêşengîye nêkero.” Ocalanî vat ke nê qiseyî seba heme sazgeh û partîyanê kurdan ameyê vatene la çi heyf o ke hema zî vurîyayîşêk çin o.
Rayberê Şarê Kurdî kitabê xo yê “Manîfestoyê Şaristanîya Demokratîke” de zî derheqê pawitişê ziwanî de vano: “Komelêko ke wayîrê ziwanê xo nêvejîyo nêeşkeno xo cuyêka kiret ra bixelesno.” Ocalan ziwanî sey unsuro tewr bingeyin ê kulturî pênase keno û vano ke komel çiqas ziwanê xo aver bero cuya xo zî hende aver şona.
