Hemsereka DEM Partî Tulay Hatîmogullari û Hemserekê DBP’yî Partîya Bindestan a Sosyalîst (ESP) zîyaret kerd. Hemsereka DEM Partî Tulay Hatimogullari zîyaret de dîyar kerd ke her çiqas ke behsê prosesê aştî yeno kerdene zî operasyonî dewam kenê û vat: “Ma do vera nê hêrişan xover bidê û heta peynî ESP’yî reyde bê.”
Polîsan 3ê sibate de eşt xeylê sazgeh, keyeyê ESP’yîjan ser o û Hemserekê ESP’yî Murat Çepnî zî tede nêzdîyê 100 kesî destbend kerdê. Hemsereka DEM Partî Tulay Hatîmogullari, Hemserekê DBP’yî Keskîn Bayindir û Çîgdem Kiliçgun Uçar, Hemverfekê HDK’yî, Hemserekê DEM Partî yê Stenbolî, temsîlkar û rayberê partîyan, temsîlîyetê DEM Partî bi amancê paştîdayîşî ESP’yî zîyaret kerd. Zîyaret awanîya temsîlkarî ya Hemserekya ESP’yî de ame kerdene.
‘Ma do hemverê nê hêrişan de vinderê’
Hemsereka DEM Partî Tulay Hatîmogullari zîyaret de dîyar kerd ke ESPyo temsîlîyetê înan rastê hêrişan ameyo û vat: “Embazê ma yê ESP’yî tena nîyê. Dewayêke de 81 kesî ameyê girewtene. Ma nê hêrişan qebul nêkenê. Ewro prosesê ke est o û behsê aştî yeno kerdene la hêriş û operasyonî dewam kenê. Ma do vera hêrişan heta peynî ESP’yî reyde bê.”
‘No operasyonê bêvengkerdişî yo, do sernêkewo’
Hemverfeka HDK’yî Meral Daniş Beştaş dîyar kerd ke ESP tena nîyo û vat: “Na dewa huqûqî nîya. 81 embazê ma bi kamcîn qerarê sîyasî ameyê girewtene? Xora girewtena Hemserekê ESP’yî, cinî û ciwanan nê qerarî eşkera keno. Nê hêrişî zî sey operasyonanê KCK’yî yê serra 2009î ameyê kerdene. La ma zanê ke hêriş est o, edalet çin o. Nê operasyonê bêvengkerdişî sernêkewenê.”
‘Vera hêrişan yewîye muhîm a’
Hemsereka Pêroyî ya DBP’yî Çîgdem Kiliçgun Uçar îfade kerd ke Tirkîya de her tim hêrişî est bî û wina vat: “Ma dî ke vera hêrişan yewîye muhîm a. ESP zî înan ra yew bi. Her wext hetê kurdan de vinderta. Ma zanê ke embazê ma senî teber de xover dayêne, zere de zî xover danê. Cayo ke komel est bi, ESP uca de bi, vengê şarê kurdî, karker, cinî û ciwanan berz kerd.”
‘ESP’yî tu wext sere netewnayo’
Nameyê ESP’yî ser o zî Parlamentera DEM Partî ya Stenbolî Çîcek Otlu qisey kerd û vat: “ESP’yî tu wext serê nêtewnayo. Embazanê ma çend rojî ra ver eşkerayî daye û dîyar kerd ke ê do tîya de bibê. Ma zî vanê senî ke verê ma meydanan de bîyê, ma do reyna dewam bikerê.”
Badê qiseyan zîyaret çapemenî ra girewte dewam kerd.
