Wezaretê Karê Zereyî, weçînayîşê herêmkî yê 31ê adare ra nat 9 şaredarîyan rê qeyyûm tayîn kerd ke 7 hebê înan yê DEM Partî yê
Hukmatê AKP û MHP’yî 2016î ra nat îradeyê weçînoxan xesb keno û şaredarîyan rê qeyyûman tayîn keno. Tayînkerdişê qeyyûman ke 2016î de dest pêkerd û badê weçînayîşê herêmkî yê 2019î dewam kerd, badê Weçînayîşê Herêmkî yê 31ê Adare 2024î zî dewam kerd. 7 şaredarîyê ke DEM Partî îdare kena û 2 şaredarîyanê CHP’yî rê qeyyûm ame tayînkerdiş.
Bi Colemêrgî dest pêkerd
Badê weçînayîşê herêmkî yê peyênan hewldayîşê ewilin qeyyûmî Wanî de bî. Hukmatê AKP û MHP’yî vera xoverdayîşê şarî de mecbur mend ke gamêk apey bierzo. 3ê hezîranî de Şaredarîya Colemêrgî rê qeyyûm ame tayînkerdiş. Hemşaredarê Şaredarîye Sidiq Akiş tepişîya. Akiş, 5ê hezîranî de Mehkemaya Cezaya Girane 1. ya Colemêrgî de 19 serrî û 6 aşmî ceza girewt.
Esenyurtî rê qeyûm
Serekê Şaredarîya Esenyurtî Ehmed Ozer ke bi modelê Pêameyîşê Bajarî ra CHP’yî ra amebi weçînayene, 30ê teşrîna verêne 2024î de bi îddîaya “endametîya rêxistine” ame destbendkerdiş û tepiştiş. Herinda Ozerî de Hetkarê Walîyê Îstanbulî Can Aksoy ame tayînkerdiş.
Darbeyê 4ê teşrîna peyêne!
4ê Teşrîna Peyêne de şaredarîyanê DEM Partî Şaristanê Girdî yê Mêrdîn, Batman û Xelfetî yê Rihayî rê qeyyûm ame tayînkerdiş.
22ê Teşrîna Peyêne de Şaredarîya Dêrsimî ya DEM Partî û Şaredarîya Pulurî (Ovacik) ya CHP’yî rê qeyyûm ame tayînkerdiş. 20ê teşrîna peyêne de Hemşaredarê Şaredarîya Dêrsimî Cewdet Konak û Serekê Şaredarîya Pulurî yê CHP’yî Mistefa Sarigulî rê 6 serrî û 3 aşmî ceza ameye dayene û no bi sedemê qeyyûmî.
29ê teşrîna peyêne de Serekê Şaredarîya Miksî (Başkale) ya Wanî ya DEM Partî Aywaz Hazir kar ra ame girewtiş û herinda ey de qeyyûm ame tayînkerdiş. Seba ke Hazirî 2015 de ke beşê çapemenî yê şaredarîye de xebitîyayêne beyanatêko çapemenî taqîb kerdbî û ey rê 3 serrî û 11 aşmî ceza ameybî dayene û seba îddîaya “propagandaya rêxistine” derheqê ey de tehqîqat dewam keno, nê bîyî sedemê qeyyûmî. DEM Partî weçînayîşê herêmkî de Wanî de 14 şaredarîyê pêroyinî qezenc kerdbî.
Şaredarîya Akdenîzî rê qeyyûm
Tewr peynî Hemşaredarê Şaredarîya Akdenîzî ya Mersînî ya DEM Partî Nurîye Aslan û Hoşyar Sariyildiz, 10ê çeleyî de ameyî destbendkerdiş û vizêr qerarê tepiştişê înan ame dayene. Ewro Şaredarîya Akdenîzî rê qeyyûm ame tayînkerdiş.
Bi no hewa hûmara şaredarîyanê ke 31ê adare ra nat qeyûm erzîyayo ser, vejîyaye 9.
