Cinîyê Wanî semedê paştîdayîşî tewrê çalakîya nobete ya Pirsûsî ya hemverê hêrişê Rojawanî bîyî qisey kerd û wina vat: “Ma nêwazenê gedeyê ma bimirê. Ganî şarê Kurdî bibo yew. Ma nê çîyê ke yenê kerdiş qebûl nêkenê.”
Cinîyê Wanijî ke tewrê çalakîya nobeta Pirsûsî bîyî, vera hêrişan reaksîyon mojnayî û çalakîyê nobetî erjnayî.
‘Ma do heta peynî têkoşîn bidê’
Hemsereka Partîya Têduştî û Demokrasî (DEM Partî) ya Artemêtî Reyhan Kaplan da zanayîş ke wexto ke seba tewrbîyayîşê çalakîya nobete bibê qerar da, kelecan bîyê û wexto ke ver bi sînorî şîyê înan rê hêriş ameyo kerdene. Reyhan Kaplan wina dewam kerd: “Vernîya ma pad. La ma xo ver da. Ma do hemverê hêrişan de xo ver bidê. Heqê înan çin o hêrişê Rojawanî bikerê. Çi karê înan uca de est o. Ma nêwazenê gedeyê ma uca de bimirê. Ma aştîye û demokrasî wazenê. Ma do heta peynî xo ver bidê.”
‘Wa gedeyê ma nêrê qetilkerdiş’
Reyhan Kaplan dîyar kerd ke her cayî de qalê têduştî yeno kerdiş û wina vat: “Ça de yo têduştî, ça de yo demokrasî, her cayî de zilm est o. Ne vanê cinî, ne vanê gedeyî, kal û pîrî, ma rê zilm kenê. Ma nê çî qebûl nêkenê. Ma nêwazenê gedeyê ma bêrê qetilkerdiş. Xoverdayîşêk pîl babeta vatişî ya. Ma do ser bikewê.”
‘Ma azadî semedê her kesî wazenê’
Hemsereka DEM Partî ya Tuşbayî Fatma Erbaga zî dîyar kerd ke Wan de bi desine kesî tewrê çalakîya Pirsûsî bîyê û vat: “Ma azadîye wazenê. Ma nêwazenê gedeyê ma bêrê qetilkerdiş. Nika Rojawan de qirkerdiş yeno ciwîyayîş. Wexto ke ez şîya sînor mî dî, ez zaf xemgîn bîya. Werrekna o sînor rawiştêne. Ma waşt ma şêrê sînor la destûr nêda. Vernîya ma pada. Ma wazenê prosesê aştîye bêro destpêkerdiş. Nê pêvînayîşî hêvî danê ma. Ma hêrişê hemverê Rojawanî şermezar kenê. Heqê tu kesî çin o hêriş bikero. Ma nê çî qebûl nêkenê. Ê ke şer dayo destpêkerdiş wa wijdanê xo rê bipersê. Do têkoşînê ma heta peynî dewam bikero.”
