Amed verba qeyûmî meş virazîya û dima meşî Hemserekê DEM Partîye yê Amedî Abbas Şahîn qise kerd û bal ant ser nîqaşê çareserîye û dîyar kerd ke eke çareserîyêk wazîyena ganî merdim bi îrade bibo, çareserî bi cidîyetî bena.
Rêxistinanê DBP û DEM Partîye, verba vatişê tayînkerdişê qeyûmî yê Şaredarîya Akdenîzî verê banê Rêxistinê DEM Partîye yê Amedî de beyanat da. Beyanatî ra Hemserekê DTK’î Berdan Ozturk, wekîlanê DEM Partîye, rêxistinanê qeza û şaristanî, hemşaredarî, Dayîkê Aştîye û zaf hûmarî de kesê beşdar bîyê. Beyanat de pankartanê “Çareserî ciddîyet wazena”, “Bijî berxwedana Rojava” akerdê û dirûşmê “Bijî berxwedana gelê Kurd” qirayê.
Beyanat de Hemserekê DEM Partîye yê Amedî Abbas Şahîn qise kerd û bal ant ser nîqaşê çareserîye û va ke: “Eke çareserîyêk wazîyena ganî merdim bi îrade bibo, bi ciddî nêz bibo. Nika warê sîyasetî de pêvajoyêk aver şona. Înkar û îmhayê şarê kurd ser o dîktatoran xelq kerdê û bi destê dîktatoran bi serran şaran ra zilm kerdê. Sûrîye de rejîmê BAAS’î, şarê Kurd bênasname verada û netîceyê ci de zî dîktatorî rijîya.”
Mesajê Abdullah Ocalan zaf muhîm ê
Abbas Şahîn bal ant ser mesajê Abdullah Ocalan û wina qedîna: “Demê pêvînayişî de Birêz Ocalan va ke; na pêvajo de ganî hesabê şenikî nîrê kerdiş. Ma veng danê AKP’î, ganî berpirsîyarîya xo bîyaro cayê xo, sabotekerdişê pêvajoye ra dûr bêro vindertiş. Yanî xespkerdişê îradeya şarî û Rojawanî ra hêriş kerdiş pêvajoye ra do zirar bido. Ma heme şaran reyde pîya cuyayê na herra de û no ser do ma sîyaseta demokratîke de israr bikê.”
