Qeyûmê Şaredarîya Dêrsimî 9 karkarê, karî ra vet. Nê karkeran Zekî Yildirim va ke: “Serraneweyî de karê ma, destpê ma rê girewtê, wazenê ma bi xizanî û vêşanî terbîye bikerê.” Berna Çelebî va ke ê wazenê ke wa sazîyan wayîrê înan bivejê.
Goreyê xebera PÎRHA’yî 22ê Teşrîne de Şaredarîyê Dêrsim û Pulurî ra bi destê Wazeretê Karanê Zereyî de qeyûm ame tayînkerdiş. Qeyûmê Şaredarîya Dêrsimî Bulent Tekbiyikoglu 31ê Kanûna 2024î de yanî şewa serraneweyî de 9 karkarê şaredarîye; Celal Aydin, Gokhan Turkkan, Alî Ercan, Zekî Yildirim, Bedrî Akyol, Berna Çelebî, Nazlı Çelîk Oz, Velî Nakiş û Cemal Gungormuş karî ra vet.
Babete ser karkarêko karî ameyo vetiş Zekî Yildirim dîyar kerd ke serra 2016î de zî hewna bi destê qeyûmî karî ra ameyo vetiş û wina va: “Ma no demî karî ra vetişê 72 karkerî, ma sey Kerbela ercnabî. No dem hewna merdiman û malbatê înan muxtacê nan û awe kerdê. Şewa serraneweyî de 9 karkarê karî ra vetê, merdim wazeno şewa serraneweyî de bi malbatê xo kêfweş bivîyarno la destê ma ra, nanê ma girewtê. Çi heyfo ke sazîyê ma, ma rê wayîr nêvejîyayê.”
Ma benda hetkarîya sazîyan ê
Maxdûr Berna Çelebî zî aşkera kerd ke bi nîşaneya butçeyî înan karî ra vetê la her kes zaneno na raşt nîya û wina dewam kerd: “Rayberîya newe, seba maxdurîyetê embazanê ma, newe ra ma reyde pêameyişêk viraşt la ma bi îdiayê butçeyî karî ra vetê la na raşt nîya. Ma wazenê wa sazî û dezgeyê ma, ma rê wayîr bivejê. Eke wayîr nêvejî do sey verên maxdûrîyetê ma bidomyo.”
